4 верасня, Івацэвіцкі раён /Кар. БЕЛТА/. Асноўная задума вучэнняў "Баявое братэрства - 2023" - знайсці шляхі і спосабы процідзеяння выклікам і пагрозам, якія могуць узнікнуць у краінах АДКБ. Аб гэтым заявіў міністр абароны Віктар Хрэнін, перадае карэспандэнт БЕЛТА.
"Асобныя заходнія палітыкі, выконваючы задачу па дэманізацыі Рэспублікі Беларусь, спрабуюць у вучэннях АДКБ знайсці нейкую канспіралогію. Не трэба яе шукаць. Гэтыя вучэнні планавыя, адкрытыя, штогод праводзяцца ў адной з краін АДКБ. Асноўная задума, мэта вучэнняў - знайсці шляхі і спосабы процідзеяння выклікам і пагрозам, якія могуць узнікнуць менавіта ў краінах АДКБ. Сістэма правядзення вучэння ў адной з краін дазваляе войскам рыхтавацца на розных участках мясцовасці - горнай, пустыннай, стэпавай або лясіста-балоцістай, як у нас на тэрыторыі Беларусі", - расказаў Віктар Хрэнін.
Ён звярнуў увагу, што такія вучэнні праводзяцца ў Беларусі не ўпершыню. Паводле яго слоў, удзельнікі і міжнародныя наглядальнікі заўсёды даюць высокую ацэнку. "І ўсе сённяшнія вучэнні праходзяць строга ў адпаведнасці з задумай, без якіх-небудзь адхіленняў. Мы дэманструем транспарэнтнасць, адкрытасць. Запрасілі апарат ваенных аташэ, наглядальнікаў, дыпламатычны корпус. 19 краін пацвердзілі свой удзел у якасці наглядальнікаў за вучэннямі АДКБ, з іх тры краіны - члены НАТА", - адзначыў Віктар Хрэнін.
Ён дадаў, што, на жаль, прадстаўнікі Польшчы адмовіліся ад запрашэння. "Гэта яшчэ раз дэманструе, што яны не хочуць наладжваць нармальныя, добрасуседскія адносіны з намі. Працягваем руку - яны па ёй б'юць. Але гэта іх справа. Паглядзім, як яны сябе будуць паводзіць далей. Заяўленыя вучэнні 17 верасня ў Польшчы, заўтра пачынаюцца натаўскія вучэнні ў Латвіі з прыцягненнем больш як 8 тыс. чалавек. Паглядзім, ці запросяць нас", - сказаў міністр абароны.
У Беларусі з 1 па 6 верасня праходзіць сумеснае аператыўна-стратэгічнае вучэнне войскаў АДКБ "Баявое братэрства". Запланаваны сумесныя і спецыяльныя вучэнні, якія ўключаюць падрыхтоўку розных кампанентаў войскаў (Калектыўных сіл) АДКБ. Манеўры праводзяць на палігонах і ўчастках мясцовасці Брэсцкай, Гродзенскай і Мінскай абласцей. У прыватнасці, ваенныя лётчыкі сёння адпрацавалі пытанні выкарыстання ўчасткаў аўтадарог у якасці запасных аэрадромаў. Адным з асноўных эпізодаў гэтага этапу вучэння стала непасрэдна пасадка ваенных самалётаў Ан-26, Су-25, Як-130 і Су-30 СМ на трасу М1.-0-
