30 студзеня, Мінск /Кар. БЕЛТА/. На пасяджэнні другой сесіі Савета Рэспублікі Нацыянальнага сходу восьмага склікання адобраны праект закона "Аб змяненні кодэксаў па пытаннях крымінальнай адказнасці", перадае карэспандэнт БЕЛТА.
Законапраектам карэкціруюцца палажэнні Крымінальнага, Крымінальна-працэсуальнага і Крымінальна-выканаўчага кодэксаў Рэспублікі Беларусь, Кодэкса Рэспублікі Беларусь аб адміністрацыйных правапарушэннях і Працэсуальна-выканаўчага кодэкса Рэспублікі Беларусь аб адміністрацыйных правапарушэннях у мэтах забеспячэння індывідуалізацыі крымінальнай адказнасці, узмацнення гуманістычнай накіраванасці крымінальнага закона, забеспячэння збалансаванасці яго норм.
У прыватнасці, перагледжаны санкцыі амаль 100 саставаў злачынстваў, у тым ліку больш за 70 - дапоўнены альтэрнатыўнымі відамі пакарання (штраф, арышт, папраўчыя работы, абмежаванне волі), уключаючы 22 саставы, у якіх прадугледжвалася выключна пазбаўленне волі. Пералік злачынстваў, учыненне якіх грамадзянамі Рэспублікі Беларусь за межамі краіны вядзе да крымінальнай адказнасці, дапоўнены злачынствамі тэрарыстычнай накіраванасці. Прапануецца не прымяняць пакаранне ў выглядзе пазбаўлення волі да жанчын і адзінокіх мужчын, якія выхоўваюць дзяцей ва ўзросце да 14 гадоў або дзяцей-інвалідаў, а таксама да непаўналетніх і інвалідаў І групы пры ўмове, калі злачынства ўчынена імі ўпершыню і не звязана з замахам на жыццё і здароўе чалавека або экстрэмісцкай дзейнасцю. Па шэрагу злачынстваў, у тым ліку эканамічнай накіраванасці, дыферэнцыруецца адказнасць (прадугледжваюцца больш мяккія віды пакарання, зніжаюцца тэрміны абмежавання волі альбо пазбаўлення волі).
У мэтах індывідуалізацыі адказнасці за незаконны абарот наркатычных сродкаў, псіхатропных рэчываў, іх прэкурсараў і аналагаў артыкул 328 Крымінальнага кодэкса Рэспублікі Беларусь дапаўняецца альтэрнатыўнымі відамі пакарання ў выглядзе арышту і абмежавання волі. Прадугледжваецца магчымасць разгляду судом пытання аб прымяненні ўмоўна-датэрміновага вызвалення асуджанага ад адбыцця пакарання і замены неадбытай часткі пакарання больш мяккім пакараннем па хадайніцтве асуджанага або яго адваката (законнага прадстаўніка). Генеральны пракурор і яго намеснікі надзяляюцца выключным правам прадаўжэння тэрміну папярэдняга следства звыш 6 месяцаў. Устанаўліваюцца мінімальныя патрабаванні да зместу скаргі ўдзельнікаў крымінальнага працэсу.-0-
