18 лютага, Мінск /Кар. БЕЛТА/. Прадстаўнікі турыстычнай сферы КНР знаёмяцца з магчымасцямі адпачынку ў Беларусі. Аб гэтым
паведамілі БЕЛТА ў Нацыянальным агенцтве па турызме.
Азнаямленчы тур прадоўжыцца да 24 лютага. Госці ўбачаць выдатныя мясціны краіны, папулярныя турыстычныя аб'екты, больш даведаюцца пра беларускія здраўніцы і індустрыю гасціннасці. Сёння дэлегацыя пабывала ў гісторыка-культурным комплексе "Лінія Сталіна". Далей у праграме аглядныя экскурсіі па Мінску, Гродне, Брэсце.
Таксама прадстаўнікі турыстычнай сферы КНР наведаюць замкавы комплекс "Мір", гісторыка-культурны музей-запаведнік "Нясвіж", шклозавод "Нёман", агратурыстычны комплекс "Каробчыцы", нацыянальны парк "Белавежская пушча", мемарыяльны комплекс "Брэсцкая крэпасць - герой".
Акрамя таго, адбудзецца сустрэча Workshop-2025, на якой абмяркуюць супрацоўніцтва паміж турыстычнымі аператарамі дзвюх краін, папулярызацыю падарожжаў у Кітай і Беларусь як прывабных турыстычных напрамкаў.-0-