30 студзеня, Мінск /Кар. БЕЛТА/. Беларусь устанавіла гістарычны рэкорд - экспарт прадуктаў харчавання ў 2025 годзе дасягнуў $10 млрд,
паведамілі БЕЛТА ў прэс-службе Міністэрства сельскай гаспадаркі і харчавання.
"У 2025 годзе Беларусь упершыню ў гісторыі суверэннай дзяржавы дасягнула самага высокага паказчыка росту экспарту харчовых тавараў і сельскагаспадарчай сыравіны. Аб'ём паставак паводле папярэдніх даных склаў $10 млрд, што пацвярджае статус краіны як надзейнага іграка на сусветным рынку прадуктаў харчавання. Харчовы экспарт фарміруе чвэрць усяго таварнага экспарту краіны, што робіць аграпрамысловы комплекс адным з ключавых рухавікоў нацыянальнай эканомікі", - расказалі ў міністэрстве.
Аснову экспартнага партфеля па-ранейшаму складае малочная прадукцыя - на яе прыпадае 40 працэнтаў усіх паставак. Мясная прадукцыя ўпэўнена ідзе за лідарам з доляй 19 працэнтаў, дэманструючы ўсё большую канкурэнтаздольнасць беларускіх прадпрыемстваў на міжнароднай арэне.
Геаграфія экспарту прадаўжае пашырацца: прадукцыя нацыянальных вытворцаў сёння пастаўляецца ў 116 краін свету. Найбольшы рост зафіксаваны па напрамках СНД, Азіі і краін далёкай дугі, дзе беларускія тавары цэняцца за высокую якасць, бяспеку і адпаведнасць міжнародным стандартам.
"Дасягнуты вынік - сведчанне ўстойлівасці нацыянальнай мадэлі развіцця АПК, заснаванай на глыбокай перапрацоўцы, навуковым суправаджэнні і стратэгічнай арыентацыі на знешнія рынкі, а таксама эфектыўнай работы Мінсельгасхарча па развіцці дыпламатычных і гандлёвых сувязей з іншымі краінамі", - падкрэслілі ў міністэрстве.-0-