Эксперт: папяровая і электронная кнігі не канкурыруюць адна з адной

14 сакавіка, Мінск /Кар. БЕЛТА/. Папяровая і электронная кнігі не канкурыруюць адна з адной, бо электронная кніга нараджалася ў дапамогу папяровай. Такім меркаваннем у час круглага стала ў Акадэміі кіравання пры Прэзідэнце, які адбыўся ў час сімпозіума XXXII Мінскай міжнароднай кніжнай выстаўкі-кірмашу, падзяліўся галоўны рэдактар расійскага выдавецтва "Маладая гвардыя", пісьменніца-біёграф і музыказнавец Марыя Залеская, перадае карэспандэнт БЕЛТА.

"Цяпер сама статыстыка сведчыць, што папяровая кніга ўжо абганяе электронную. Але я не ставіла б пытанне, ці канкурыруюць яны адна з адной. Электронная кніга нараджалася ў дапамогу папяровай, і такой і застаецца", - сказала яна.

Марыя Залеская падкрэсліла, што шматлікія медыцынскія даследаванні даказваюць: тэкст лепш запамінаецца, калі ён прачытаны на паперы, а не на экране электроннага носьбіта. "Таму няхай электронная кніга будзе нам у дапамогу, а папяровая прадоўжыць нас адукоўваць", - дадала галоўны рэдактар "Маладой гвардыі".

На яе думку, менавіта культура ў самым шырокім сэнсе гэтага слова дапамагае нам усім сёння аб'яднацца.

"Выдавецтва "Маладая гвардыя" нязменна выпускае серыю "Жыццё выдатных людзей". Яна існуе ўжо 135 гадоў і перакідвае масты ў тры стагоддзі. Гэта серыя сабрала ўвесь здабытак чалавецтва. На кніжнай паліцы прадстаўлена ўся сусветная гісторыя. І вось тут вось вострыя вуглы сціраюцца. Кніжная паліца прымірае. Яна вымушае зразумець і прыняць, нешта ўбачыць па-новаму і нешта для сябе адкрыць", - адзначыла Марыя Залеская.

Паводле яе слоў, цяпер выдавецтва цесна супрацоўнічае з Казахстанам, Беларуссю і Татарстанам, а таксама плануе падпісаць дагавор аб супрацоўніцтве з Саюзам пісьменнікаў Беларусі.

"На самай справе перспектывы вельмі шырокія, і я гэтаму бязмерна рада. Мы ўсе будзем развівацца і ўмацоўваць нашу дружбу", - рэзюмавала Марыя Залеская.-0-