1 кастрычніка, Мінск /Кар. БЕЛТА/. Грыпу ў Беларусі пакуль няма, уздым захваральнасці чакаецца ў канцы студзеня - лютым, паведаміла журналістам намеснік галоўнага ўрача па эпідэміялогіі Рэспубліканскага цэнтра гігіены, эпідэміялогіі і грамадскага здароўя Ала Дашкевіч,
перадае карэспандэнт БЕЛТА.
"Цыркуляцыі вірусаў грыпу цяпер не адзначаецца. Разам з тым у далейшым мы ўсё ж такі чакаем павелічэнне колькасці захварэлых у традыцыйныя для нашай краіны тэрміны. Гэта канец студзеня - люты", - сказала Ала Дашкевіч.
З пачатку верасня павялічылася колькасць людзей з вострымі рэспіраторнымі інфекцыямі. Сітуацыя заканамерная - яна адзначаецца з году ў год і звязана з вяртаннем дзяцей, студэнтаў у арганізаваныя калектывы, заканчэннем масавай адпускной кампаніі.
"У цэлым цяпер сітуацыя па захваральнасці на вострыя рэспіраторныя інфекцыі не выклікае якіх-небудзь апасенняў. Захваральнасць знаходзіцца на ўзроўні сярэдніх шматгадовых даных", - сказала Ала Дашкевіч.
Па выніках лабараторных даследаванняў устаноўлена цыркуляцыя негрыпозных рэспіраторных вірусаў: адэнавірусаў, рэспіраторна-сінцытыяльнага віруса, рынавірусаў. Таксама цыркулюе SARS-CoV-2, які за апошнія гады набыў сезонны характар.-0-