5 жніўня, Мінск /Кар. БЕЛТА/. Рэкамендацыі, як паводзіць сябе за рулём у спёку, далі ва УУС Брэсцкага аблвыканкама,
паведамляе БЕЛТА.
Летняя спёка - сур'ёзнае выпрабаванне не толькі для аўтамабіля, але і для вадзіцеля. Высокая тэмпература ў салоне і абязводжванне значна зніжаюць канцэнтрацыю ўвагі і запавольваюць рэакцыю, што робіць паездку небяспечнай.
Каб захаваць пільнасць і здароўе ў спёку, перш за ўсё неабходна піць ваду. Нават лёгкае абязводжванне можа выклікаць стомленасць і галавакружэнне, таму ў салоне заўсёды павінен быць дастатковы запас пітной вады.
Выкарыстоўваць кандыцыянер таксама трэба разумна. Не варта адразу пасля пасадкі ў гарачую машыну ўстанаўліваць мінімальную тэмпературу. Рэзкі перапад можа выклікаць сасудзісты спазм і справакаваць недамаганне. Лепш, каб розніца паміж тэмпературай на вуліцы і ў салоне складала не больш за 5-7 градусаў.
Калі паездка працяглая, кожныя 1,5-2 гадзіны варта спыняцца на 10-15 мінут. Можна выйсці з машыны, зрабіць лёгкую размінку і памыцца халаднаватай вадой. Гэта дапаможа аднавіць канцэнтрацыю ўвагі.
ДАІ раіць па магчымасці ставіць аўтамабіль у цені або выкарыстоўваць сонцаахоўныя экраны. Гэта зменшыць награванне салона і рызыку перагрэву. Ні ў якім разе нельга пакідаць дзяцей і жывёл у закрытым аўтамабілі нават на кароткі час: салон можа нагрэцца да смяротна небяспечнай тэмпературы за лічаныя хвіліны.-0-