Калуга і Брэст сталі гарадамі-партнёрамі

28 ліпеня, Мінск /Кар. БЕЛТА/. Брэст і Калуга падпісалі пагадненне аб ажыццяўленні міжнародных і знешнеэканамічных сувязей у гандлёва-эканамічнай, навукова-тэхнічнай і сацыяльна-культурнай сферах, перадае карэспандэнт БЕЛТА.

Цырымонія прайшла ў Мінску па выніках пасяджэння сумеснай рабочай групы па супрацоўніцтве Рэспублікі Беларусь і Калужскай вобласці Расійскай Федэрацыі пад старшынствам міністра архітэктуры і будаўніцтва Вадзіма Альшэўскага і губернатара Калужскай вобласці Уладзіслава Шапшы. Подпісы пад дакументам паставілі кіраўнік гарадской акругі горада Калугі Дзмітрый Дзянісаў і першы намеснік старшыні Брэсцкага гарвыканкама Юрый Клімаховіч.

Як расказаў БЕЛТА Дзмітрый Дзянісаў, пагадненне - першы крок да ўстанаўлення пабрацімскіх адносін. Брэст для расіян - сімвал і ўвасабленне мужнасці, самаадданасці ў справе абароны радзімы. Для калужан надзвычайна важна наладзіць сувязі з гэтым горадам. Пакуль у Калугі ў Беларусі толькі адзін пабрацім - Мінск. Адпаведнае пагадненне падпісана ў 2015 годзе.

У Брэсцкім гарвыканкаме ў сваю чаргу адзначылі, што пагадненне стане фундаментам для новых сумесных праектаў, умацавання дружалюбных сувязей і выхаду на практычныя рашэнні ў інтарэсах жыхароў абодвух гарадоў.-0-
Фота Таццяны Матусевіч