Міжнародны форум "Вялікая спадчына - агульная будучыня" адбудзецца 21-22 чэрвеня ў Брэсце

11 сакавіка, Мінск /Кар. БЕЛТА/. Другі міжнародны форум "Вялікая спадчына - агульная будучыня" адбудзецца 21-22 чэрвеня ў Брэсце, паведаміў журналістам намеснік старшыні Палаты прадстаўнікоў Вадзім Іпатаў перад пасяджэннем арганізацыйнага камітэта па падрыхтоўцы і правядзенні форуму, якое праходзіць у Палаце прадстаўнікоў, перадае карэспандэнт БЕЛТА.

Форум прымеркаваны да трагічнай даты - 85-годдзя пачатку Вялікай Айчыннай вайны. Выбар месца правядзення мерапрыемства сімвалічны - горад Брэст. Подзвіг абаронцаў Брэсцкай крэпасці - сімвал мужнасці і гераізму продкаў, якія прынялі на сябе першы ўдар нацысцкіх полчышчаў.

Вадзім Іпатаў нагадаў, што першы такі форум адбыўся ў мінулым годзе ў Валгаградзе. Ён гучна заявіў на ўвесь свет аб тым, што Беларусь і Расія будуць захоўваць свае традыцыі, захоўваць гісторыю і змагацца супраць скажэнняў гісторыі.

"У сувязі з гэтым прынята рашэнне аб правядзенні другога міжнароднага форуму, які адбудзецца 21-22 чэрвеня ў горадзе Брэсце. І гэта вельмі сімвалічна. Гэта тое месца, якое ведаюць не толькі ў Рэспубліцы Беларусь і Расійскай Федэрацыі, але і на прасторах былога Савецкага Саюза. Гэта месца, дзе ўпершыню далі адпор полчышчам нацыстаў. І мы ганарымся гэтым подзвігам. І, вядома ж, менавіта тут хочам ушанаваць памяць тых людзей, якія ўступілі ў бой з карычневай чумой", - сказаў намеснік старшыні Палаты прадстаўнікоў.
Паводле яго слоў, прыблізная праграма ўжо звярстана. З правядзеннем сёння арганізацыйнага камітэта будзе дадзены старт усім арганізацыйным мерапрыемствам, пачынаючы ад падрыхтоўкі месцаў правядзення мерапрыемства і заканчваючы яго галоўнай часткай - абмеркаваннем гістарычных старонак, якія фальсіфікуюцца.

"Вядома ж, мы будзем абмяркоўваць і ўдзел моладзі ў гэтым важным міжнародным форуме, паколькі разрываць пакаленні ў гэтым пытанні катэгарычна нельга", - упэўнены Вадзім Іпатаў.