17 лютага, Мінск /Кар. БЕЛТА/. На харчовай выстаўцы Gulfood у Дубаі сваю прадукцыю прэзентавалі 13 беларускіх прадпрыемстваў,
паведамілі карэспандэнту БЕЛТА ў Беларускай гандлёва-прамысловай палаце.
У бягучым годзе Gulfood - гэта 30-я юбілейная выстаўка, у якой беларускі бок рэгулярна ўдзельнічае з 2016 года. "Адбылося адкрыццё нашай экспазіцыі. У гэтым годзе прадстаўлена 13 беларускіх прадпрыемстваў-экспарцёраў. У першую чаргу гэта мяса-малочная прадукцыя, хлебабулачныя вырабы. Тут вялікая колькасць удзельнікаў", - расказаў старшыня БелГПП Міхаіл Мятлікаў.
На мерапрыемстве прысутнічаюць пакупнікі са 198 краін свету.
Міжнародная выстаўка прадуктаў харчавання і напіткаў Gulfood - буйнейшая і самая ўплывовая ў свеце штогадовая галіновая падзея. Выстаўка збірае вытворцаў, імпарцёраў, дыстрыб'ютараў прадуктаў харчавання, а таксама рэстаратараў. Асаблівай папулярнасцю выстаўка Gulfood карыстаецца ў наведвальнікаў з краін Персідскага заліва, паколькі больш за 95 працэнтаў прадуктаў харчавання тут імпартуецца.-0-