8 кастрычніка, Брэст /Кар. БЕЛТА/. У Брэсце ў 2027 годзе плануюць правесці культурны забег. Аб гэтым
паведамілі карэспандэнту БЕЛТА ва ўпраўленні спорту Брэсцкага аблвыканкама.
У Брэсцкай вобласці расце папулярнасць бегу для падтрымання здаровага ладу жыцця і добрай фізічнай формы. У рэгіёне такі інтарэс людзей заахвочваюць. "Будзем развіваць забегі, якія ў нас існуюць на гэты момант. Гэта "Забег "Першых", забег на "Зубр-фэсце", баранавіцкую “Жырандолю”, Маларыцкі марафон. Ёсць планы зрабіць культурны забег у Брэсце. Прапрацоўваем такую ідэю з камандай арганізатараў", - расказалі аб задуме ва ўпраўленні спорту.
Спартыўных мерапрыемстваў такога фармату ў Брэсцкай вобласці яшчэ не праводзілі. Маршрут культурнага забегу ўключае наведванне музеяў, для яго правядзення не патрабуецца перакрыццё вуліц для руху транспарту. "У бегавой супольнасці Расіі ён набывае вялікую папулярнасць. Разумеем, што гэта будзе цікава і ў нас. Гэта забег не ў прывычным фармаце. Людзі пераадольваюць дыстанцыю, а забягаючы ў музей, пераходзяць на крок і глядзяць там экспазіцыю. Выходзячы на вуліцу, далей бягуць па маршруце", - растлумачылі ва ўпраўленні спорту.
Забег, які дае магчымасць убачыць родны горад пад іншым ракурсам, можа быць цікавы брастаўчанам. Таксама гэта выдатная магчымасць для турыстычнага развіцця абласнога цэнтра, каб госці маглі актыўна правесці час і азнаёміцца з мясцовай культурай.
Гэта не адзіная задума для аматараў бегу, над якой працуюць у Брэсцкай вобласці. "Будзе праводзіцца забег у час абласнога зімовага фестывалю "Берасцейскія сані" ў студзені. Думаем, ён будзе набіраць папулярнасць, паколькі забегаў зімой цяпер мала ў Беларусі", - акцэнтавалі ўвагу ва ўпраўленні спорту.
Дарэчы, у бліжэйшыя выхадныя, 10 кастрычніка, у паўднёва-заходнім рэгіёне ўжо 43 раз пройдзе Маларыцкі міжнародны марафон. На яго старт выйдуць больш за 1 тыс. чалавек. Гэта частка праекта "Бегавая ліга" Беларускай федэрацыі лёгкай атлетыкі.-0-