29 ліпеня, Мінск /Кар. БЕЛТА/. Забарона на наведванне лясоў дзейнічае ў трох раёнах краіны, таксама ў шэрагу раёнаў застаюцца ў сіле абмежавальныя меры. Аб гэтым
паведамляе БЕЛТА са спасылкай на інтэрактыўную карту Мінлясгаса.
Забарона на наведванне лясоў дзейнічае ў Слуцкім раёне Мінскай вобласці, а таксама Жыткавіцкім і Лельчыцкім - Гомельскай.
Паўсюдна па Віцебскай вобласці дзейнічаюць абмежаванні, за выключэннем пяці раёнаў - Верхнядзвінскага, Браслаўскага, Шаркаўшчынскага, Пастаўскага і Лепельскага.
У Мінскай, Гомельскай і Магілёўскай абласцях ёсць як адкрытыя для наведвання лясы, так і з дзеючымі абмежаваннямі.
Самай "зялёнай" застаецца на карце тэрыторыя Гродзенскай вобласці, дзе наведванне лясоў дазволена ва ўсіх раёнах. Таксама лясны масіў адкрыты ў Брэсцкай, за выключэннем абмежавальных мер у Лунінецкім раёне.
Інтэрактыўная карта абнаўляецца ў анлайн-рэжыме, таму перад наведваннем лясных масіваў трэба азнаёміцца з актуальнай сітуацыяй.-0-