14 красавіка, Мінск /Кар. БЕЛТА/. Абмежаванні на наведванне лясоў уведзены ў двух раёнах Беларусі, паведамляе БЕЛТА са спасылкай на інтэрактыўную карту Міністэрства лясной гаспадаркі.
Паводле даных на 9 гадзін 14 красавіка, абмежаванні на наведванне лясных масіваў уведзены толькі ў Баранавіцкім і Ляхавіцкім раёнах Брэсцкай вобласці. Усе астатнія лясы раёнаў краіны застаюцца свабоднымі для наведвання.
Аператыўна адсочваць даныя аб увядзенні мер абмежавальнага характару можна па размешчанай на афіцыйным сайце Мінлясгаса карце забарон і абмежаванняў на наведванне лясоў. Таксама інфармацыю можна ўдакладніць у мясцовых райвыканкамах і лесагаспадарчых установах. Інтэрактыўная карта абнаўляецца ў анлайн-рэжыме, таму перад наведваннем лясных масіваў варта азнаёміцца з актуальнай сітуацыяй.-0-
