13 лютага, Мінск /Кар. БЕЛТА/. Як у Беларусі вырашаюць праблему бяздомных жывёл, БЕЛТА расказалі ў Міністэрстве жыллёва-камунальнай гаспадаркі.
У Беларусі адлоў бяздомных жывёл праводзіцца спецыялізаванымі арганізацыямі, вызначанымі выканкамамі ў кожным канкрэтным населеным пункце. У большасці выпадкаў такімі арганізацыямі з'яўляюцца прадпрыемствы жыллёва-камунальнай гаспадаркі.
"На жаль, праблему бяздомных жывёл немагчыма вырашыць або нават мінімізаваць толькі з дапамогай адлову. Гэта можна будзе зрабіць толькі ў тым выпадку, калі мы пачнём з поўнай адказнасцю і любоўю адносіцца да братоў нашых меншых", - адзначылі ў МЖКГ.
Для таго каб бяздомных жывёл стала менш, ужо цяпер можна чыпіраваць сваіх дамашніх жывёл. Электронны чып аблягчае і паскарае пошук згубленых жывёл, поўнасцю выключае выпадкі пазбаўлення ад іх без прыцягнення да адказнасці, дазваляе кантраляваць і зніжаць колькасць бяздомных жывёл. Акрамя таго, стэрылізацыя - гэта адзіны гуманны спосаб спыніць бескантрольнае размнажэнне. У першую чаргу гэта датычыцца беспародных катоў і сабак.
Нельга адпускаць ката або сабаку гуляць без нагляду. Выпускаць жывёл з кватэр шматкватэрных жылых дамоў без суправаджэння ўладальнікаў з'яўляецца парушэннем заканадаўства.
"Калі вы не можаце больш трымаць у сябе дома ката або сабаку, разгледзьце магчымасць аддаць іх сваім знаёмым, сваякам, размясціце аб'яву ў інтэрнэце, звярніцеся за дапамогай у зоаахоўныя арганізацыі і ў прыватныя прытулкі для жывёл", - рэкамендавалі ў ведамстве.-0-
