30 жніўня, Мінск /Кар. БЕЛТА/. "У новы навучальны год - бяспечных усім дарог!" - пад такім дэвізам у рэспубліцы праходзіць Адзіны дзень бяспекі дарожнага руху, прысвечаны прафілактыцы дзіцячага дарожна-транспартнага траўматызму перад пачаткам навучальнага года, паведамілі БЕЛТА ў прэс-службе МУС Беларусі.
Супрацоўнікі ДАІ сканцэнтруюць намаганні на правядзенні прафілактычнай работы з дзецьмі, бацькамі і вадзіцелямі.
З пачатку навучальнага года для прафілактыкі парушэнняў ПДР і аказання дапамогі маленькім удзельнікам дарожнага руху паблізу школ і ў месцах вялікай колькасці дзяцей-пешаходаў раніцай будуць арганізаваны дзяжурствы супрацоўнікаў міліцыі. Таксама інспектары ДАІ прымуць удзел ва ўрачыстых лінейках, правядуць з навучэнцамі заняткі па Правілах дарожнага руху і адпрацоўцы навыкаў іх прымянення.
Нарады ДПС пракантралююць выкананне норм бяспечнай перавозкі дзяцей, праезду пешаходных пераходаў, спынення і стаянкі транспартных сродкаў, будуць спыняць парушэнні з боку пешаходаў і веласіпедыстаў.
У МУС нагадалі, што вадзіцелям неабходна быць вельмі ўважлівымі пры руху паблізу ўстаноў адукацыі, пры праездзе нерэгулюемых пешаходных пераходаў і ў дварах. Бацькам трэба рэгулярна нагадваць маленькім і старэйшым дзецям аб мерах бяспекі на дарозе, гэта дапаможа засцерагчы іх ад бяды.-0-
