13 верасня, Мінск /Кар. БЕЛТА/. Парламентарыі Беларусі і КНР выйдуць на новы ўзровень узаемадзеяння, рыхтуецца адпаведнае пагадненне. Аб гэтым заявіў старшыня Палаты прадстаўнікоў Уладзімір Андрэйчанка ў інтэрв'ю праграме "Размова ў Прэзідэнта" на тэлеканале "Беларусь 1", паведамляе БЕЛТА.
Развіццё адносін з парламентарыямі РФ і КНР - адзін з прыярытэтных напрамкаў работы Нацыянальнага сходу Беларусі. "Паказчыкам паспяховасці любога супрацоўніцтва з'яўляецца знешнегандлёвы абарот. У 2022 годзе паміж Беларуссю і Кітаем ён перавысіў $5 млрд. Расце наш экспарт у КНР. Паміж парламентарыямі наладжаны актыўны дыялог. Мы рэгулярна праводзім сустрэчы па відэа-канферэнц-сувязі са старшынёй парламента Кітая, старшынямі камітэтаў. Цяпер па даручэнні Прэзідэнта Беларусі мы ўзнімаем узровень супрацоўніцтва з рабочых груп да камітэтаў высокага ўзроўню. Цяпер рыхтуецца адпаведнае пагадненне, і ў бліжэйшы час яно будзе падпісана. Гэта больш высокі ўзровень узаемаадносін. Мэта - развіццё гандлёва-эканамічнага, культурнага супрацоўніцтва, узаемадзеяння ў галіне адукацыі, аховы здароўя, забеспячэння нацыянальнай бяспекі", - падкрэсліў Уладзімір Андрэйчанка.
Работа з РФ вядзецца ў тым ліку праз Парламенцкі сход Саюза Беларусі і Расіі. "Мы ўвялі такія формы работы, як "урадавы час", дзе заслухоўваем даклады нашых міністраў аб тым, як ідзе рэалізацыя 28 саюзных праграм. Сёння беларуска-расійскія адносіны знаходзяцца на ўздыме, расце тавараабарот", - сказаў старшыня Палаты прадстаўнікоў.
Нядаўна ў Пскове адбылося пашыранае пасяджэнне Савета Парламенцкага сходу Саюза Беларусі і Расіі. "Мы разгледзелі бюджэт на наступны год, пытанне стварэння роўных правоў для грамадзян Беларусі і Расіі ў плане сацыяльна-працоўных адносін. Таксама было прынята рашэнне аб тым, што трэба разгледзець пытанне развіцця турызму. Таксама абмяркоўвалі арганізацыю пасажырскіх зносін, каб хадзілі прыгарадныя паязды паміж раёнамі, паміж Псковам і Віцебскам", - адзначыў Уладзімір Андрэйчанка.
Што датычыцца саюзнага бюджэту, то ў яго рамках рэалізуецца пяць праграм. "Цяпер падрыхтаваны на наступны год яшчэ чатыры праграмы і тры мерапрыемствы. І ў цэлым бюджэт у наступным годзе павялічаны на 38 працэнтаў і складзе 6,5 млрд расійскіх рублёў. Праграмы датычацца ваенна-тэхнічнага супрацоўніцтва, біятэхналогій, рэканструкцыі Брэсцкай крэпасці", - звярнуў увагу старшыня Палаты прадстаўнікоў.-0-
