1 ліпеня, Мінск /Кар. БЕЛТА/. Прэм'ер-міністр Беларусі Раман Галоўчанка ўручыў дзяржаўныя ўзнагароды прадстаўнікам розных сфер, перадае карэспандэнт БЕЛТА.
"Сёння па даручэнні Прэзідэнта Беларусі заслужаныя ўзнагароды ўручаны сапраўдным прафесіяналам, чыя праца, талент, адданасць сваёй справе па праву адзначаны дзяржавай. Тое, што сённяшняе мерапрыемства праходзіць напярэдадні нашага галоўнага дзяржаўнага свята - Дня Незалежнасці, надае асаблівую важнасць і ўрачыстасць. Адзінства, нацыянальная самасвядомасць і нязломная воля нашых продкаў прадвызначылі стварэнне суверэннай беларускай дзяржавы. Беларусы заслужылі права жыць ва ўласнай незалежнай краіне, не шкадавалі сябе ў барацьбе з акупантамі ў гады Вялікай Айчыннай вайны, самааддана працавалі, узнаўляючы вызваленую краіну і аднаўляючы народную гаспадарку. Наш свяшчэнны абавязак - берагчы дасягненні продкаў і ўносіць свой уклад ва ўмацаванне і працвітанне нашай роднай Беларусі", - канстатаваў Раман Галоўчанка.
Ён адзначыў, што сёння ў краіне дынамічна развіваецца эканоміка, разам з ёй прамысловасць, сельская гаспадарка, ахова здароўя, адукацыя, навука і сфера інавацыйных тэхналогій, культура. "Гаворачы пра багацце краіны, мы часта ўяўляем усе гэтыя сферы. І сапраўды, нам ёсць чым ганарыцца. Аднак сапраўдная аснова дабрабыту любой нацыі - гэта яе людзі, самаадданыя, працавітыя, сумленныя і верныя сваёй справе, такія, як прысутныя ў зале. І ў гэты знамянальны дзень мы з гонарам адзначаем менавіта ваш уклад у працвітанне нашай Радзімы. Кожны з вас - яскравы прыклад таго, што ўпартая праца і самааддача прыносяць неабходныя вынікі і прызнаюцца на дзяржаўным узроўні", - падкрэсліў прэм'ер-міністр.
Медалямі "За працоўныя заслугі" сёння ўзнагароджаны прадстаўнікі розных сфер, сярод іх асабліва шмат работнікаў аграпрамысловага комплексу. "Дзякуючы праводзімай аграрнай палітыцы Беларусь сёння - самадастатковая дзяржава, якая забяспечвае сваю і не толькі сваю харчовую бяспеку. Што асабліва важна, нашы прадукты харчавання карыстаюцца попытам на знешніх рынках. За што цэняць беларускае? Вядома ж, за якасць, якая дасягаецца дзякуючы вашай упартай працы. Дзякуй вам за адданасць справе", - сказаў кіраўнік беларускага ўрада.
Сярод узнагароджаных і шматлікія прадстаўнікі сферы адукацыі. "Вы закладваеце трывалы падмурак ведаў і маральных арыенціраў, фарміруеце асобу, вучыце крытычна думаць і несці адказнасць за свае ўчынкі, рыхтуеце маладых людзей да іх будучай прафесійнай дзейнасці. Значнасць вашай работы для Беларусі цяжка пераацаніць", - зрабіў акцэнт Раман Галоўчанка.
Медалямі "За бездакорную службу" сёння ўзнагароджаны дзяржаўныя служачыя. "Рэалізацыя маштабных праектаў, якаснае вырашэнне пастаўленых кіраўніцтвам краіны задач шмат у чым залежаць ад прафесіяналізму кіраўніцкіх кадраў. На дзяржаўнай службе выпадковых людзей няма і быць не можа. Гэта актыўныя патрыёты, якія ставяць інтарэсы дзяржавы і грамадства вышэй за ўласныя, не лічачыся з асабістым часам пры выкананні службовых задач. Па-іншаму і не можа быць. Разлічваю, што і ў далейшым вы будзеце несці вашу службу з гонарам і годнасцю", - звярнуў увагу прэм'ер-міністр.
Сярод узнагароджаных і прадстаўнікі сфер энергетыкі, статыстыкі, юстыцыі, інфармацыі, лясной гаспадаркі. Іх уклад у нацыянальную эканоміку па заслугах ацэнены дзяржавай.
"Нячаста ўручаецца медаль "За выратаванае жыццё". Але сёння менавіта такі дзень. Рызыкуючы ўласным жыццём, Андрэй Здановіч (муляр аддзела па эксплуатацыі і рамонце жылфонду "Брэсцкай ЖКГ". - Заўвага БЕЛТА) выратаваў пяцігадовую дзяўчынку. За адвагу, праяўленую пры выратаванні чалавека пры пажары, ён удастоены гэтай высокай узнагароды", - адзначыў кіраўнік урада.
У размове з журналістамі Андрэй Здановіч адзначыў, што зусім не адчувае сябе героем. Паводле яго слоў, калі ён убачыў, што ў суседзяў пажар у кватэры, ён нават не раздумваў, у галаве была толькі думка, што трэба выратаваць дзіця.
"Поспех і дасягненні прысутных у зале - гэта не выпадковасць, а вынік упартай працы, настойлівасці і любові да той справы, якой вы служыце. Высокія дзяржаўныя ўзнагароды сведчаць аб тым, што вы не толькі дасягнулі значных вынікаў у сваёй рабоце, але і сталі прыкладам для іншых. І ў вашых узнагародах адлюстраваны вынік працы ўсіх тых калектываў, у якіх вы працуеце. Краіна ганарыцца вашымі дасягненнямі. Дазвольце шчыра павіншаваць вас з гэтым запамінальным і ўрачыстым днём і з будучым дзяржаўным святам - Днём Незалежнасці", - рэзюмаваў Раман Галоўчанка.-0-
