У Брэсце 5 красавіка завяршаецца ацяпляльны сезон. Такое рашэнне падпісаў кіраўнік горада Сяргей Лабадзінскі, паведамляе БЕЛТА са спасылкай на гарвыканкам.
"Адключэнне сістэм ацяплення спажыўцоў цеплавой энергіі будзе праводзіцца паслядоўна", - звярнулі ўвагу ў гарвыканкаме. На першым этапе цяпло перастануць падаваць на прамысловыя прадпрыемствы, у грамадскія і адміністрацыйныя будынкі. Затым падыдзе чарга тэатраў і сістэмы адукацыі (за выключэннем школьных і дзіцячых дашкольных устаноў), жыллёвага фонду. На завяршальным этапе спыняць падачу цяпла ў гасцініцы, бібліятэкі, дзяржаўныя архівы, музеі, установы сацыяльнага забеспячэння, медыцынскія, лячэбна-прафілактычныя, школьныя і дзіцячыя дашкольныя ўстановы.
"Усе аварыйныя сітуацыі ўстараняліся своечасова, яны мелі лакальны характар. Доўгатэрміновых адключэнняў удалося пазбегнуць. Звязана гэта з якаснай падрыхтоўкай да ацяпляльнага перыяду. Пачалі падрыхтоўку ўжо да ацяпляльнага сезона наступнага перыяду. Абходзім свае цеплавыя пункты. Распрацавана праектна-каштарысная дакументацыя на замену папярэдне ізаляваных труб у поўным аб'ёме, гэта больш за 12 км. Вядзецца закупка. Гатовы актыўна ўключацца ў стадыю работы па ацяпляльным сезоне 2024/25", - расказаў генеральны дырэктар КУШВП "Брэсцкая гарадская ЖКГ" Андрэй Гашаў.
Сіноптыкі абнадзейваюць брэстаўчан цёплым красавіцкім надвор'ем. Пры магчымым рэзкім пахаладанні камунальныя службы гатовы аператыўна ўключыць ацяпленне. "Калі ўзнікне неабходнасць яшчэ раз уключыцца на нейкі перыяд часу, будзем гатовы да гэтага", - падкрэсліў Андрэй Гашаў.-0-
