26 ліпеня, Мінск /Кар. БЕЛТА/. Беларускія сацыяльныя службы аказалі дапамогу пацярпелым ад стыхійных бедстваў на суму каля Br62,5 тыс., паведамілі БЕЛТА ў прэс-службе Міністэрства працы і сацыяльнай абароны.
"Пасля непагоды работнікамі сферы сацыяльнай абароны штодзённа аказваецца падтрымка грамадзянам, якія сутыкнуліся з сур'ёзнымі выпрабаваннямі надвор'ем. Рознага віду дапамога аказана амаль 280 грамадзянам на суму Br62,5 тыс. Гэта ў першую чаргу адзінокія пажылыя людзі, інваліды, сем'і з дзецьмі. Сацыяльныя работнікі прымалі актыўны ўдзел у расчыстцы прысядзібных тэрыторый, садзейнічанні ў прыцягненні пабочных арганізацый для ўстаранення наступстваў урагану, наведвалі і супакойвалі сваіх падапечных, прывозілі прадукты, лякарствы, ваду", - праінфармавалі ў ведамстве.
Пацярпелыя ад непагоды маглі звярнуцца ў ТЦСА па месцы жыхарства па адрасную дапамогу ў выглядзе аднаразовай дапамогі. Яна прадастаўляецца тым, чый даход у ліпені на аднаго члена сям'і не перавышае Br628,10 у месяц. Таксама непрацуючыя пенсіянеры і інваліды, пацярпелыя ад непагоды, звярталіся па матэрыяльную дапамогу са сродкаў Фонду сацыяльнай абароны насельніцтва.-0-
