20 снежня, Брэст /Кар. БЕЛТА/. Адкрыты рэспубліканскі навагодні турнір па фехтаванні сярод юнакоў і дзяўчат праходзіць з 19 па 24 снежня ў спартыўных залах спецыялізаванай дзіцяча-юнацкай школы алімпійскага рэзерву нумар 3 Брэста. Аб гэтым паведаміў карэспандэнту БЕЛТА намеснік дырэктара па асноўнай дзейнасці СДЮШАР Фёдар Неміровіч.
Спаборніцтвы праходзяць у трох узроставых групах. Да ўдзелу запрошаны спартсмены 2009-2013 гадоў нараджэння і маладзейшыя. Самым старэйшым удзельнікам па 14 гадоў, самым юным - па 8. Усяго заяўкі на ўдзел падалі больш як 400 спартсменаў з Беларусі і Расіі. Юная змена айчыннага фехтавання прадстаўлена школамі ўсіх абласцей і Мінска. З падмаскоўнага горада Хімкі прыслалі заяўку на ўдзел 23 шаблісты.
Турнір стартаваў 19 снежня з паядынкаў юнакоў-шпажыстаў. Сёння ў гэтай жа дысцыпліне эстафету ў іх прымуць дзяўчаты. Прадоўжаць спаборніцтвы 21-22 снежня рапірысты. Сярод шаблістаў мацнейшых выявяць у ходзе паядынкаў 23 і 24 снежня.
"Навагодні турнір па фехтаванні мы праводзім больш за дзесяць гадоў, першапачаткова - на прызы нашай СДЮШАР. Затым яго пад свой патранаж узяў аддзел спорту і турызму Брэсцкага гарвыканкама. Свой цяперашні статус - адкрытых рэспубліканскіх спаборніцтваў - турнір атрымаў каля пяці гадоў таму. Ён уключаны ў каляндар спаборніцтваў Міністэрства спорту і турызму і праводзіцца ў рамках Дзіцячай лігі Беларусі па фехтаванні як адзін з яе этапаў. Дзеці з вялікім задавальненнем удзельнічаюць у гэтых спаборніцтвах", - адзначыў Фёдар Неміровіч.
Адкрыты рэспубліканскі навагодні турнір - адзін з трох, якія развівае брэсцкая СДЮШАР нумар 3. Яму папярэднічае лістападаўскі рэспубліканскі турнір па фехтаванні, прысвечаны памяці герояў абароны Брэсцкай крэпасці. А ў маі на базе СДЮШАР праходзіць фінальны этап Дзіцячай лігі па фехтаванні - адкрыты рэспубліканскі турнір, прысвечаны Дню Перамогі ў Вялікай Айчыннай вайне.-0-
