16 ліпеня, Мінск /Кар. БЕЛТА/. З 1 студзеня 2025 года ў краіне вырастуць дапамогі па цяжарнасці і родах пасля ўступлення ў сілу закона "Аб змяненні законаў па пытаннях дзяржаўных дапамог сем'ям, якія выхоўваюць дзяцей". Аб гэтым журналістам расказала намеснік кіраўніка ФСАН Кацярына Ліхачова, перадае карэспандэнт БЕЛТА.
Сёння мінімальная дапамога для працуючых, у якіх агульны страхавы стаж меншы за 6 месяцаў, і беспрацоўных грамадзян складае 50 працэнтаў БПМ. Згодна змененаму заканадаўству яна будзе павялічана. "На аснове навацый заканадаўства дапамога па цяжарнасці і родах для беспрацоўных грамадзян пры ўмове, што перыяд назначэння дапамогі не пазней за 6 месяцаў з даты звальнення, будзе складаць 100 працэнтаў бюджэту пражытачнага мінімуму", - адзначыла Кацярына Ліхачова.
"Таксама законам устаноўлена, што мінімальны памер дапамогі па цяжарнасці і родах для працуючых грамадзян будзе складаць памер мінімальнай заработнай платы. У абсалютных лічбах гэта Br626", - адзначыла намеснік кіраўніка.
Сем'і, якія выхоўваюць дзіця-інваліда, атрымаюць дадатковую падтрымку. Так, ім будзе прадастаўлена права на атрыманне ўсіх відаў дзяржаўных дапамог у перыяд кароткатэрміновага знаходжання дзіцяці-інваліда ў доме дзіцяці ў сувязі з аказаннем яму паслугі медыка-сацыяльнай дапамогі. А таксама новым заканадаўствам устаноўлена, што, калі ў сям'і больш як адно дзіця-інвалід і ім неабходна суправаджэнне, двое бацькоў будуць забяспечаны дапамогай па доглядзе ў перыяд санаторна-курортнага лячэння.-0-
