7 ліпеня, Брэст /Кар. БЕЛТА/. У Пінску 7-9 ліпеня пройдуць рэспубліканскія спаборніцтвы па веславанні на байдарках і каноэ - "Мемарыял юнгі Алега Альхоўскага". Турнір прысвечаны Дню вызвалення Пінска ад нямецка-фашысцкіх захопнікаў, паведаміў карэспандэнту БЕЛТА галоўны суддзя спаборніцтваў Яўген Драко.
Спаборнічаць за тытул самага хуткага на водах ракі Піна будуць юнакі і дзяўчаты 2009-2010 гадоў нараджэння і маладзейшыя. На турнір заяўлены прадстаўнікі ўсіх абласцей і Мінска. Падлеткі выявяць мацнейшых у веславанні на байдарках і каноэ (адзіночкі) на дыстанцыях 200 м і 1000 м.
"Гэтыя спаборніцтвы для самых малодшых узростаў, сярод якіх праводзяцца спаборніцтвы ў рэспубліцы. Для некаторых юнакоў і дзяўчат гэта будуць іх першыя спаборніцтвы. У нас выступаюць не зборныя абласцей і Мінска, свае каманды прывозяць спартыўныя школы", - заўважыў Яўген Драко. Пераможцы і прызёры турніру будуць заахвочаны граматамі і медалямі, грашовымі прызамі.
У час гонак за юнакамі і дзяўчатамі будуць пільна назіраць трэнеры, ацэньваючы патэнцыял юных байдарачнікаў і канаістаў. Па выніках выступлення нехта, магчыма, будзе запрошаны на далейшае навучанне ў вучылішчы алімпійскага рэзерву.
"Мемарыял юнгі Алега Альхоўскага" - спаборніцтвы з даўняй гісторыяй. У Пінску іх пачалі праводзіць яшчэ ў 1960-я гады.-0-
