11 ліпеня, Брэст /Кар. БЕЛТА/. Адкрыты чэмпіянат Беларусі па акадэмічным веславанні сярод мужчын і жанчын пройдзе з 12 па 15 ліпеня на Брэсцкім вяслярным канале, паведаміў карэспандэнту БЕЛТА спецыяліст па сувязях з грамадскасцю абласнога цэнтра алімпійскага рэзерву па веславанні Алег Голас.
Для ўдзелу ў спаборніцтвах заявіліся каля 170 спартсменаў з Беларусі (зборныя каманды ўсіх абласцей і Мінска), а таксама зборная каманда з Расійскай Федэрацыі ў складзе 40 чалавек. У ліку айчынных зорак акадэмічнага веславання на вадзе Брэсцкага вяслярнага канала выступяць Таццяна Клімовіч, Алена Фурман, Іван Брынза, Піліп Павукоў, а таксама іншыя вядомыя спартсмены-акадэмісты, у тым ліку перспектыўная моладзь.
Адкрыты чэмпіянат Беларусі з удзелам расійскіх весляроў праводзіцца ў Брэсце другі год запар. Спаборніцтвы з'яўляюцца адборачным стартам для вызначэння кандыдатаў на ўдзел у чэмпіянаце Расіі па акадэмічным веславанні. У праграме - заплывы на дыстанцыі 2000 м на лодках-адзіночках, экіпажаў на двойках і чацвёрках парных і без рулявых, васьмёрак з рулявым.
Урачыстае адкрыццё чэмпіянату адбудзецца 12 ліпеня ў 14.00. Перад гасцямі і ўдзельнікамі спаборніцтваў выступяць юныя артысты вакальнай студыі творчага цэнтра "Арт-Піпер" і школы танца, спорту і прыгажосці "ВаВёрКа студыа".
Адразу пасля адкрыцця стартуюць папярэднія заплывы. Другі і трэці спаборніцкія дні пачнуцца з жаночых паўфіналаў у 10.00, у заключны дзень, 15 ліпеня, - у 09.00. Уваход на трыбуны для гледачоў Брэсцкага вяслярнага канала бясплатны.-0-
