8 красавіка, Мінск /Кар. БЕЛТА/. У акцыі "Дай лесу новае жыццё!" прынялі ўдзел ужо больш за 43 тыс. беларусаў. Аб гэтым паведамілі БЕЛТА ў прэс-службе Міністэрства лясной гаспадаркі.
Валанцёры разам з работнікамі лясгасаў правялі лесааднаўленне на плошчы больш за 4,5 тыс. га. Найбольшы фронт работ - звыш 2,3 тыс. га - выкананы ў Гомельскай вобласці, якая больш за іншых пацярпела ў выніку разгулу ліпеньскай стыхіі.
Работы па пасадцы лесу праведзены амаль на 1,9 тыс. участкаў. У рамках акцыі ўжо высаджана больш за 23,5 млн дрэў.
Добраахвотная грамадская акцыя "Дай лесу новае жыццё!" праходзіць у Беларусі да 12 красавіка ўключна. Ініцыятыва Мінлясгаса прысвечана Году добраўпарадкавання і 80-годдзю Перамогі савецкага народа ў Вялікай Айчыннай вайне. Гэта ўжо другі этап акцыі. У мінулым годзе старт ініцыятыве Мінлясгаса даў асабіста Прэзідэнт Аляксандр Лукашэнка.-0-
