У Брэсцкай вобласці на пераднавагоднія таргі выстаўлена серыя буйных аб'ектаў нерухомай маёмасці вытворчага і грамадскага прызначэння. Аб гэтым паведамілі карэспандэнту БЕЛТА ў камітэце "Брэстаблмаёмасць".
Апошнія ў бягучым годзе электронныя таргі "Брэстаблмаёмасць" назначыла на 26 і 28 снежня. Аб'екты, якія прапануюцца да продажу, размешчаны на тэрыторыі розных гарадоў і раёнаў вобласці. Для большасці з іх гэта паўторныя таргі з пачатковай цаной продажу, роўнай адной базавай велічыні. У прыватнасці, 26 снежня за Br37 можна набыць два аб'екты гісторыка-культурнай каштоўнасці ў абласным цэнтры. Двухпавярховы адміністрацыйны будынак па вул. Брэсцкіх дывізій, 15А, плошчай 3,3 тыс. кв.м быў пабудаваны да 1917 года і ўваходзіць у склад комплекснай гісторыка-культурнай каштоўнасці "Казармы". Абарончая казарма "Ж-З" па вул. Ліпеньскай, 10А, з'яўляецца часткай сістэмы фартоў і фартыфікацыйных пабудоў Брэсцкай крэпасці.
Таксама на таргі 26 снежня ў Брэсце ўпершыню выстаўлены на продаж комплекс вытворчых будынкаў і збудаванняў па вул. Янкі Купалы, 5, больш вядомы як фабрыка сувеніраў "Славянка". Прадавец - Слонімская фабрыка мастацкіх вырабаў - ацаніла сваю маёмасць на Br2,6 млн. Лот прэтэндуе стаць адным з самых дарагіх у гэтым годзе. Зямельны ўчастак плошчай 1,3 га прадастаўляецца ў арэнду на 50 гадоў.
На 28 снежня назначаны таргі па продажы двух магазінаў у Пружанах, складоў у Пінску і Баранавічах, лабараторна-бытавога корпуса (аб'ект ГА) у Брэсце. За выключэннем маналітнага складскога збудавання па вул. Іркуцка-Пінскай дывізіі (цана лота зніжана на 80 працэнтаў), усе аб'екты ўпершыню выстаўлены на продаж. Напрыклад, блочны складскі будынак 1993 года ўзвядзення ў Баранавічах прадавец ацаніў на Br1,1 млн. Пачатковая цана будынка ЛБК з падземным паверхам па вул. Янкі Купалы, 3Г, у абласным цэнтры - Br1,3 млн.
Усяго з пачатку года на тэрыторыі Брэсцкай вобласці з таргоў прададзена больш за 70 невыкарыстоўваемых аб'ектаў дзяржмаёмасці. Рэзультатыўнымі былі і апошнія таргі гэтага месяца, якія адбыліся на электроннай пляцоўцы Беларускай універсальнай таварнай біржы. На аднапавярховы тэхнічны будынак 1963 года пабудовы па вул.Карбышава ў Брэсце прэтэндавалі тры пакупнікі. У выніку цана лота вырасла ў 1,9 раза - да Br147,7 тыс. Новым уласнікам нерухомай маёмасці, якую можна выкарыстоўваць для размяшчэння гандлёва-бытавых аб'ектаў, стала прыватная кампанія.
