7 красавіка, Брэст /Кар. БЕЛТА/. Брэсцкі акадэмічны тэатр драмы будзе супрацоўнічаць з Дзяржаўным маладзёжным тэатрам Узбекістана, паведаміла карэспандэнту БЕЛТА генеральны дырэктар Брэсцкага акадэмічнага тэатра драмы (БАТД) Ганна Сенькавец.
Брастаўчане 3-5 красавіка ў Санкт-Пецярбургу ўдзельнічалі ў міжнароднай канферэнцыі "Рускі тэатр за мяжой як інстытут рускай культуры". На яе палях адбылося падпісанне мемарандума аб супрацоўніцтве паміж тэатрамі з Брэста і Ташкента. Подпісы пад дакументам паставілі дырэктар Брэсцкага акадэмічнага тэатра драмы Ганна Сенькавец і дырэктар Дзяржаўнага маладзёжнага тэатра Узбекістана Фарход Джураеў.
"Ужо ў нас падпісаны пагадненні з Самаркандскім абласным рускім тэатрам і Ферганскім рускім драматычным тэатрам. У маладзёжным тэатры Узбекістана ведаюць наш тэатр, яго калектыў і атмасферу, і вельмі хацелі падпісаць мемарандум аб супрацоўніцтве. Яны ў мінулым годзе ўдзельнічалі ў міжнародным фестывалі "Белая вежа" і цяпер чакаюць нас у сябе, плануюць запрасіць у Ташкент з гастролямі на юбілей маладзёжнага тэатра", - расказала кіраўнік БАТД.
Паводле слоў Ганны Сенькавец, гэты год для трупы Брэсцкага акадэмічнага тэатра драмы будзе насычаным у плане ўдзелу ў розных фестывалях. "У канцы мая паляцім у Іркуцк, дзе 1 чэрвеня спектаклем "Не пакідай мяне" адкрываем фестываль, прысвечаны 80-годдзю Перамогі. 22 чэрвеня едзем у Архангельскую вобласць, дзе таксама пакажам "Не пакідай мяне". У кастрычніку – Арол і Пенза", - пералічыла дырэктар тэатра. Акрамя гэтага, БАТД рыхтуецца да ўласнага традыцыйнага фестывалю "Белая Вежа".
Дарэчы, у Брэсцкім акадэмічным тэатры драмы ў хуткім часе прадставяць прэм'еру спектакля "Вера" да юбілею Перамогі ў Вялікай Айчыннай вайне.-0-
