24 красавіка, Мінск /Кар. БЕЛТА/. VII Усебеларускі народны сход пройдзе ў Мінску 24-25 красавіка пад дэвізам "Час выбраў нас!", паведамляе БЕЛТА.
Прэзідэнт Беларусі Аляксандр Лукашэнка ў ходзе падрыхтоўкі форуму неаднаразова падкрэсліваў асаблівае значэнне і статус маючага адбыцца мерапрыемства, паколькі гэта будзе хоць і сёмы Усебеларускі народны сход, але яго першае пасяджэнне ў новай якасці, зафіксаванай у абноўленай Канстытуцыі. "Так, гэта сёмае скліканне, але яно асаблівае, яно канстытуцыйнае. Таму вельмі важна і знешне, і па змесце правесці яго на самым высокім узроўні, - падкрэсліў Аляксандр Лукашэнка. - Гэта і ўрачыста павінна быць, і, самае галоўнае, змястоўна".
Згодна з заканадаўствам, гранічная колькасць дэлегатаў Усебеларускага народнага сходу складае 1200 чалавек. На мерапрыемства таксама запрошаны больш як 700 гасцей. У Мінску збяруцца дэлегаты з розных рэгіёнаў краіны - прадстаўнікі заканадаўчай, выканаўчай і судовай улады, мясцовых Саветаў дэпутатаў, грамадзянскай супольнасці.
Плануецца, што перад дэлегатамі і гасцямі форуму выступіць кіраўнік беларускай дзяржавы. Як ён сам адзначаў у размове з журналістамі, УНС павінен пачацца з кампактнага даклада Прэзідэнта аб сітуацыі ў свеце, эканоміцы краіны, існуючых выкліках і пагрозах. "І потым ужо, адштурхоўваючыся ад гэтага, - і кадры, і наша абаронная дактрына, і іншае", - адзначыў ён.
Усебеларускі народны сход праводзіцца ў Беларусі з 1996 года. Тады, у цяжкі для краіны час вострай палітычнай барацьбы і сацыяльна-эканамічных непарадкаў Прэзідэнт Аляксандр Лукашэнка звярнуўся за падтрымкай да народа, склікаўшы першы УНС. Прынятыя на тым сходзе, а праз месяц і на рэферэндуме, рашэнні сфарміравалі палітычнае аблічча сучаснай Беларусі, мадэрнізавалі структуру ўлады, задалі дакладныя арыенціры ў развіцці краіны.
З таго часу стала традыцыяй раз у пяць гадоў праводзіць УНС, на якім пры шырокім удзеле прадстаўнікоў улады і грамадства разглядаліся стратэгічныя пытанні ў жыцці краіны. Такія народныя форумы адбыліся таксама ў 2001, 2006, 2010, 2016, 2021 гадах.
Карані гэтай традыцыі ляжаць глыбока ў гісторыі краіны. На народным вечы на беларускіх землях спрадвеку вырашаліся самыя складаныя пытанні.
Цяпер УНС - гэтай вышэйшы прадстаўнічы орган народаўладдзя Рэспублікі Беларусь, які вызначае стратэгічныя напрамкі развіцця грамадства і дзяржавы, забяспечвае непахіснасць канстытуцыйнага ладу, пераемнасць пакаленняў і грамадзянскую згоду. Інакш кажучы, гэта калектыўны розум, прызначаны выбіраць аптымальны варыянт развіцця краіны, стабілізаваць грамадства на ўсіх этапах яго развіцця і ажыццяўляць сур'ёзны народны канстытуцыйны кантроль над усімі працэсамі ў краіне.
З іншага боку, УНС з яго новымі паўнамоцтвамі яшчэ трэба будзе на практыцы акуратна знайсці сваё месца ў сучасным грамадскім ладзе. Аб гэтым у тым ліку пойдзе размова на маючым адбыцца пасяджэнні.
Асаблівасцю новага статусу Усебеларускага народнага сходу з'яўляецца тое, што цяпер гэты орган будзе праводзіць пасяджэнні не раз у пяць гадоў, а не радзей за адзін раз у год. Тэрмін паўнамоцтваў УНС складае пяць гадоў.
На маючым адбыцца пасяджэнні будуць разглядацца як арганізацыйныя пытанні, звязаныя з работай самога УНС (неабходна выбраць падліковую камісію, старшыню УНС, намесніка старшыні, прэзідыум УНС - пастаянна дзеючы рабочы орган, прыняць часовы рэгламент работы), так і важныя для краіны дакументы.
Гэта абноўленыя Канцэпцыя нацыянальнай бяспекі і Ваенная дактрына - асноўныя дакументы, якія рэгламентуюць падыходы дзяржавы да забеспячэння ўласнай бяспекі ў розных сферах з улікам геапалітычных змяненняў у свеце, асноўныя погляды дзяржавы на мір і вайну, прымяненне ваеннай сілы ў рамках рэагавання на існуючыя выклікі і пагрозы. Пры гэтым у цэлым захоўваецца пераемнасць і асноўны пасыл пра міралюбны характар беларускага народа.
Усебеларускі народны сход надзелены правам зацвярджаць асноўныя напрамкі ўнутранай і знешняй палітыкі, ваенную дактрыну, канцэпцыю нацыянальнай бяспекі; зацвярджаць праграмы сацыяльна-эканамічнага развіцця Рэспублікі Беларусь; заслухоўваць прэм'ер-міністра аб выкананні праграм сацыяльна-эканамічнага развіцця Рэспублікі Беларусь. Усебеларускі народны сход надзелены правам заканадаўчай ініцыятывы.
Рашэнні УНС з'яўляюцца абавязковымі для выканання і могуць адмяняць прававыя акты, іншыя рашэнні дзяржаўных органаў і службовых асоб, якія супярэчаць інтарэсам нацыянальнай бяспекі, за выключэннем актаў судовых органаў.-0-
