2 мая, Брэст /Кар. БЕЛТА/. У Брэсце сёння сустрэлі ўдзельнікаў аўтапрабегу "Агонь Памяці", якія даставілі часцінку Вечнага агню з мемарыяльнага комплексу "Паклонная гара" ў Маскве, перадае карэспандэнт БЕЛТА.
Усерасійская акцыя праводзіцца пад эгідай грамадскага руху "Народны фронт "За Расію" пры падтрымцы Адміністрацыі Прэзідэнта Беларусі і прысвечана 78-й гадавіне Перамогі савецкага народа ў Вялікай Айчыннай вайне. Маршрут аўтапрабегу праходзіць па месцах баявой славы Расіі і Беларусі, яго працягласць складзе больш за 2,5 тыс. км. Гэта сёмая па ліку акцыя, у гэтым годзе ў ёй удзельнічаюць больш як 60 расіян. У асноўным гэта сем'і з дзецьмі, якія прыбылі ў Брэст на 23 аўтамабілях. Самаму старэйшаму члену экіпажа 73 гады, самаму малодшаму - 11 месяцаў.
"Калі мы арганізоўвалі першы аўтапрабег, былі абмежаваны ў часе і яшчэ не былі ўпэўнены ў сваіх сілах. Тады мы даехалі да Хатыні і Мінска. Але ведалі, куды ехаць далей. З кожным годам прабегі становяцца больш працяглымі і масавымі. Мы загадзя бяром водпускі на гэты час, рыхтуемся, узгадняем маршрут з беларускім бокам", - расказаў кіраўнік грамадскага руху "Агонь Памяці" Сяргей Ігнацьеў.
Першым прыпынкам эстафеты, куды даставілі часцінку Вечнага агню з Паклоннай гары ў Маскве, стаў мемарыяльны комплекс "Брэсцкая крэпасць-герой". Удзельнікаў аўтапрабегу віталі старшыня Брэсцкага гарадскога Савета дэпутатаў Мікалай Красоўскі, генеральны консул Расіі ў Брэсце Алег Мурашаў, дырэктар комплексу Рыгор Бысюк, актывісты БРСМ, прадстаўнікі грамадскасці горада. Госці ўсклалі вянок да Вечнага агню мемарыяла, для іх правялі экскурсію па крэпасці.
"Я пяты раз удзельнічаю ў аўтапрабегу, і кожны раз новыя эмоцыі - столькі людзей апладзіруюць, здымаюць, сігналяць, махаюць. Ёсць адчуванне, што людзі памятаюць. Першы раз мы па сваёй ініцыятыве ехалі. Праз сем гадоў аўтапрабег ужо набраў такія абароты, што ніхто нават не думаў аб гэтым. Мне 16 гадоў, я з 11 гадоў езджу, часцей - з бацькам, але сёння - і з маці, і з бацькам. У гэтым годзе ўдалася такая сямейная паездка. Я на чатыры дні са школы адпрасілася, таму што для мяне вельмі важная гэта паездка. Многія гавораць, трэба гэта забыць, што было - тое было. Але як можна забыць гісторыю сваёй краіны, тых, хто загінуў дзеля жыцця цяпер", - задаецца рытарычным пытаннем маскоўская школьніца Любоў Міхалёва.
Заўтра аўтапрабег "Агонь Памяці" будуць сустракаць у Пружанах, Свіслачы і Гродне. 4 мая маршрут акцыі пройдзе праз Шчучын, Ліду, Ашмяны і Вілейку. 5 мая часцінку агню з Паклоннай гары даставяць у мемарыяльны комплекс "Хатынь", Бягомль і Віцебск. Па маршруце руху запланаваны наведванне месцаў баявой славы, сустрэчы з ветэранамі Вялікай Айчыннай вайны і жыхарамі населеных пунктаў.-0-
