18 снежня, Мінск /Кар. БЕЛТА/. У Целяханскай спецыяльнай школе-інтэрнаце прайшоў навагодні паказ у рамках рэспубліканскай дабрачыннай акцыі "Нашы дзеці". Аб гэтым БЕЛТА паведамілі ў Міністэрстве ўнутраных спраў.
Міністр унутраных спраў Іван Кубракоў павіншаваў з надыходзячымі святамі і ўручыў навучэнцам салодкія падарункі. "Мы, дарослыя, шчаслівыя бачыць сёння вашы ўсмешкі. Новы год - час цудаў, сюрпрызаў. Жадаю кожнаму з вас шмат радасных імгненняў. Няхай збудуцца ўсе мары", - сказаў Іван Кубракоў.
Словы ўдзячнасці кіраўнік міліцэйскага ведамства адрасаваў і педагогам: "Вы, як ніхто іншы, разумееце, што чужых дзяцей не бывае. Захапляюся людзьмі вашай прафесіі. Жадаю цярплівасці, дабрыні, моцнага здароўя і ўсяго найлепшага".
У размове з журналістамі Іван Кубракоў адзначыў, што органы ўнутраных спраў па традыцыі далучыліся да акцыі "Нашы дзеці", якая стартавала па ўсёй краіне. Хацеў бы адзначыць, што дапамогу такім установам адукацыі, як Целяханская спецыяльная школа-інтэрнат, мы аказваем рэгулярна і па многіх напрамках", - падкрэсліў ён.
Міністр дадаў, што сродкі, якія па суду выплачваюцца міліцыянерам і іх сем'ям, якія пацярпелі ад проціпраўных дзеянняў, супрацоўнікі перадаюць у дзіцячыя дамы. Вось і сёння так зрабіў баец атрада міліцыі асобага прызначэння.
У школу-інтэрнат праваахоўнікі прыехалі яшчэ па адной важнай прычыне. "Упершыню ў такой установе адукацыі адкрыўся ваенна-патрыятычны клуб. У моладзі стала трэндам уступаць у такія фарміраванні. І целяханскія навучэнцы здзейснілі сваю мару", - рэзюмаваў Іван Кубракоў.
Кіраўнік міліцэйскага ведамства таксама падзяліўся, што на яго зрабіў уражанне верш "Мая міліцыя", які напісаў дзесяцікласнік Максім Мялік, а прачытаў вучань 6-га класа Яўген Цымбал.
Фота МУС
