4 верасня, Мінск /Кар. БЕЛТА/. Вучэнні АДКБ "Баявое братэрства", якія праходзяць на тэрыторыі Беларусі, маюць абарончы характар. Такую думку карэспандэнту БЕЛТА выказаў намеснік старшыні Пастаяннай камісіі па нацыянальнай бяспецы Палаты прадстаўнікоў Аляксандр Маркевіч.
Паводле яго слоў, асноўная мэта вучэнняў - адпрацоўка ўзаемадзеяння калектыўных сіл аператыўнага рэагавання. "Вучэнні маюць выключна абарончы характар і садзейнічаюць павышэнню з'яднанасці і абараназдольнасці войскаў дзяржаў-членаў АДКБ. Іх мэта - адпрацоўка ўзаемадзеяння КСАР", - адзначыў ён.
Дэпутат нагадаў, што правядзенне гэтых вучэнняў прадугледжана планам сумеснай падрыхтоўкі органаў кіравання фарміраванняў калектыўнай бяспекі АДКБ на 2023 год. "Гэтыя вучэнні маюць абарончы характар не толькі па сутнасці, але і па значэнні. Прэзідэнт выразна абазначыў, што Беларусь гатова прыняць наглядальнікаў з Польшчы і паказаць ім, што адбываецца на вучэннях. А гэта дакладнае сведчанне таго, што яны маюць выключна абарончы характар і нам няма чаго ўтойваць. І ўжо тым больш няма падстаў для хвалявання ў нашых суседзяў - ніякай пагрозы гэтыя вучэнні не нясуць".
Разам з тым Аляксандр Маркевіч звярнуў увагу, што краіны Захаду павінны ў поўнай меры ўсведамляць небяспеку правакацыйных авантур на граніцах Саюзнай дзяржавы і АДКБ. "Для Захаду гэтыя вучэнні маюць выразны сігнал. Нягледзячы на ўсе іх патугі, АДКБ - эфектыўная ваенна-палітычная арганізацыя, накіраваная на ўмацаванне бяспекі. А цяперашнія вучэнні дэманструюць, што не толькі палітычны, але і ваенны кампанент таксама знаходзіцца на вельмі высокім узроўні. І тое, што вучэнні праводзяцца ў абмежаваныя тэрміны, паказвае, што ўсе пытанні, у тым ліку і з лагістыкай спецпадраздзяленняў, дакладна адпрацаваны. І мы гатовы даць хуткі і дзейсны адпор у выпадку неабходнасці", - дадаў ён.
Парламентарый звярнуў асаблівую ўвагу, што боегатоўнасць калектыўных сіл знаходзіцца на вельмі высокім узроўні. "І гэта дакладны элемент стрымлівання мілітарысцкіх планаў і задум, якія ёсць у Захаду", - адзначыў Аляксандр Маркевіч.
Таксама ён заявіў, што ўзброеныя сілы Саюзнай дзяржавы поўнасцю ажыццяўляюць яе бяспеку. "Узаемадзеянне Беларусі і Расіі знаходзіцца на найвышэйшым узроўні. У нас фарміруецца адзіная абаронная прастора. У краін ёсць поўнае ўзаемаразуменне ў тым ліку і ў пытаннях абароны. А цяперашнія вучэнні ў рамках АДКБ пасадзейнічаюць умацаванню двухбаковых кантактаў па забеспячэнні нацыянальнай бяспекі Саюзнай дзяржавы", - рэзюмаваў дэпутат.
Сумеснае аператыўна-стратэгічнае вучэнне войскаў АДКБ "Баявое братэрства" праходзіць у Беларусі з 1 па 6 верасня. Манеўры ваеннаслужачыя праводзяць на палігонах і ўчастках мясцовасці Брэсцкай, Гродзенскай і Мінскай абласцей.-0-
