Дзяржпадтрымка малога і сярэдняга бізнесу ў 2024 годзе павялічана на больш як Br1 млрд у рамках дзяржпраграмы "Малое і сярэдняе прадпрымальніцтва", што рэалізуецца ў 2021-2025 гадах. Аб гэтым заявіў намеснік дырэктара Дэпартамента па прадпрымальніцтве Міністэрства эканомікі Руслан Невяровіч у эфіры тэлеканала "Беларусь 1", паведамляе БЕЛТА.
Паводле слоў Руслана Невяровіча, прадугледжана павелічэнне аб'ёмаў фінансавання мерапрыемстваў гэтай праграмы ў бягучым годзе на больш як Br1 млрд. У прыватнасці, павялічаны аб'ёмы сродкаў рэспубліканскага бюджэту на аказанне дзяржаўнай фінансавай падтрымкі суб'ектаў малога і сярэдняга прадпрымальніцтва ў бягучым годзе на суму каля Br7 млн, сродкаў Банка развіцця - на Br90 млн, сродкаў камерцыйных банкаў, якія ажыццяўляюць крэдытную падтрымку малога і сярэдняга бізнесу ў рамках дзяржаўнай праграмы, - на Br1 млрд у 2024 годзе і на такую ж суму ў 2025 годзе. Дзяржпраграмай на 2024 год на падтрымку бізнесу запланаваны сродкі ў памеры Br7,5 млрд.
Ён таксама адзначыў, што павелічэнне фінансавання прадугледжана ў мэтах рэалізацыі прынятага ў красавіку бягучага года закона нумар 365-З "Аб змяненні законаў па пытаннях прадпрымальніцкай дзейнасці". Дакумент прадугледжвае пашырэнне доступу суб'ектаў МСП да фінансавых рэсурсаў. З прыняццем закона дзяржаўная фінансавая падтрымка, якая раней была даступна толькі для прадстаўнікоў малога прадпрымальніцтва, распаўсюджваецца цяпер і на сярэднія арганізацыі з колькасцю занятых да 250 чалавек.
Законам таксама прадугледжана пашырэнне відаў дзяржаўнай падтрымкі. "Гэта значыць да існуючых відаў падтрымкі дадаюцца дадатковыя інструменты. Па-першае, гэта паручыцельства па пазыковых абавязацельствах, якія будуць прадастаўляцца Беларускім фондам фінансавай падтрымкі прадпрымальнікаў. Такая падтрымка дасць магчымасць суб'ектам малога і сярэдняга прадпрымальніцтва забяспечыць больш бесперашкодны доступ да крэдытных рэсурсаў. Яшчэ адзін новы інструмент - гранты, якія будуць прадастаўляцца на бязвыплатнай, незваротнай аснове за кошт сродкаў мясцовых бюджэтаў. Мэты, на якія суб'екты малога і сярэдняга прадпрымальніцтва змогуць атрымаць такую падтрымку, будуць вызначаны мясцовымі органамі ўлады, зыходзячы з патрэбнасцей развіцця канкрэтных тэрыторый", - растлумачыў Руслан Невяровіч.-0-
