18 жніўня, Мінск /Кар. БЕЛТА/. У Брэсце 28-30 верасня плануюць правесці 12-ы Форум гарадоў-пабрацімаў Беларусі і Расіі. Аб гэтым карэспандэнту БЕЛТА расказаў старшыня праўлення Беларускай грамадскай арганізацыі "Пародненыя гарады" Барыс Батура.
На мерапрыемстве будуць абмяркоўвацца пытанні беларуска-расійскага эканамічнага і дзелавога супрацоўніцтва, абмену вопытам дзейнасці ў сацыяльнай сферы, у тым ліку адукацыі, культуры і турызме. Акрамя таго, плануецца правядзенне маладзёжнай сустрэчы, у цэнтры ўвагі якой будуць тэмы патрыятычнага выхавання. Удзельнікі мерапрыемства, а іх чакаецца больш за 150 чалавек, наведаюць прадпрыемствы і ўстановы Брэста, у тым ліку Брэсцкую крэпасць-герой.
Папярэдняя, 11-я сустрэча гарадоў-пабрацімаў Беларусі і Расіі, прысвечаная ўмацаванню Саюзнай дзяржавы ва ўмовах знешніх выклікаў і пагроз, 14-16 кастрычніка адбылася ў Пскове. У мерапрыемстве прынялі ўдзел каля 60 беларускіх і расійскіх гарадоў. Прывітанне ўдзельнікам і гасцям сустрэчы накіравалі Прэзідэнт Беларусі Аляксандр Лукашэнка і Прэзідэнт Расіі Уладзімір Пуцін.-0-
