Як накапіць дадатковую пенсію з падтрымкай дзяржавы, расказалі БЕЛТА ў прэс-службе Міністэрства працы і сацыяльнай абароны.
Праграма "тры плюс тры" прадугледжвае ўсяго два крокі. Трэба падаць заяву і заключыць дагавор з дзяржаўным прадпрыемствам "Стравіта" непасрэдна ў страхоўшчыка або ў электронным выглядзе праз афіцыйны сайт, а затым звярнуцца да наймальніка з копіяй дагавора і заявай аб пералічэнні адпаведнага страхавога ўзносу.
Уступаць у праграму страхавання можна не пазней як за тры гады да дасягнення агульнаўстаноўленага пенсійнага ўзросту. Дадатковыя ўзносы на накапляльную пенсію будуць штомесяц пералічвацца работадаўцам па заяве работніка.
Можна змяніць тарыф узносу на накапляльную пенсію, але не часцей як адзін раз у год. Таксама грамадзянін мае права ў любы момант прыпыніць свой удзел у праграме і потым аднавіць выплату дадатковых узносаў.
Пры дасягненні агульнаўстаноўленага пенсійнага ўзросту страхоўшчыкам работніку штомесяц будзе выплачвацца дадатковая накапляльная пенсія на працягу пяці або дзесяці гадоў (на выбар грамадзяніна).
У праграме ўжо ўдзельнічаюць 52,6 тыс. беларусаў.-0-
