Аб тым, якую падтрымку акажуць ветэранам на 80-годдзе Перамогі ў Вялікай Айчыннай вайне, расказалі БЕЛТА ў прэс-службе Міністэрства працы і сацыяльнай абароны.
У ведамстве адзначылі, што да 1 сакавіка 2025 года будзе ўнесены праект пастановы ўрада аб памерах і тэрмінах выплат матэрыяльнай дапамогі. У мінулым годзе такія выплаты склалі ад Br1 тыс. да Br4 тыс.
Таксама ў Мінпрацы падкрэслілі, што першачарговая задача ў пачатку года - сіламі сацыяльных службаў высветліць, у чым маюць патрэбу ветэраны, сабраць заяўкі і арганізаваць аказанне дапамогі. У 2024 годзе дапамога ветэранам была аказана на суму Br440 тыс. Гэта ўключала проціпажарныя мерапрыемствы, рамонтныя работы і набыццё асобных лякарстваў і медыкаментаў.
На гэты момант у краіне пражываюць 875 ветэранаў Вялікай Айчыннай вайны і 6,6 тыс. пацярпелых ад наступстваў вайны.
З 1 мая 2025 года ўступае ў сілу закон аб ветэранах, які таксама прадугледжвае дадатковыя меры падтрымкі. Пасля ўступлення ў сілу навацый ваеннаслужачыя, якія маюць ордэны і медалі і служылі ў тыле, будуць аднесены да катэгорыі ўдзельнікаў Вялікай Айчыннай вайны. Адпаведна, ім будзе павялічана павышэнне да пенсіі з 50 працэнтаў мінімальнай пенсіі па ўзросце да 250 працэнтаў.
Акрамя таго, прадугледжана падтрымка для такой шырокай катэгорыі, як былыя вязні фашызму, а іх у краіне амаль 6 тыс. Гэта бясплатнае забеспячэнне лекавымі сродкамі, тэхнічнымі сродкамі сацыяльнай рэабілітацыі, зубапратэзаваннем і санітарна-курортным лячэннем.-0-
