У Брэсцкім палацы водных відаў спорту з 21 па 25 лістапада пройдзе адкрытае першынство па водным пола памяці трэнера Рамана Босака, паведаміў карэспандэнту БЕЛТА інструктар-метадыст абласнога цэнтра алімпійскага рэзерву па водных відах спорту Сяргей Сачнёў.
Штогадовы мемарыял, які стаў ужо традыцыйным, на гэты раз сабраў каля 150 спартсменаў. У спаборніцтвах прымаюць удзел 10 каманд, у тым ліку 6 - з Беларусі і 4 - з Расіі. І калі "Неўская хваля" з Санкт-Пецярбурга і каманда з падмаскоўнага Чэхава - можна сказаць, заўсёднікі турніру, то прадстаўнікі Казані і Чэлябінска ўпершыню сярод яго ўдзельнікаў. Іх сапернікамі стануць каманды юных ватэрпалістаў з Мінска, Брэста, Віцебска, Гомеля і Магілёва.
"Спаборніцтвы праводзяцца сярод юнакоў і дзяўчат 2010-2011 гадоў нараджэння. Але ў асноўным будуць прадстаўлены юнацкія склады. На першынство Брэст выстаўляе дзве каманды хлопчыкаў. Таксама мы спрабуем развіваць дзявочае воднае пола - у мінулым годзе ў нас адбыўся першы набор дзяўчынак у гэту секцыю", - расказаў Сяргей Сачнёў.
Спаборніцтвы юных ватэрпалістаў пройдуць у скачковым басейне, умовы якога даюць магчымасць праводзіць там дзіцячыя спаборніцтвы. Першынство стартуе сёння ў 12.00 з гульні паміж камандамі СДЮШАР з Гомеля і ЦАР Брэста. У канцы першага дня спаборніцтваў сустрэнуцца каманды Санкт-Пецярбурга і Віцебскай вобласці. Штодзённа будзе праходзіць па 6-8 камандных сустрэч. Пераможца і прызёры турніру вызначацца 25 лістапада. Уваход на спаборніцтвы свабодны.
