Беларускі саюз жанчын складае аснову грамадзянскай супольнасці ў Беларусі. Аб гэтым заявіла старшыня Савета Рэспублікі Наталля Качанава на сустрэчы з калектывам Брэсцкай абласной арганізацыі Беларускага саюза жанчын, перадае карэспандэнт БЕЛТА.
"Беларускі саюз жанчын - адна з вядучых вялікіх арганізацый, якія ёсць у нашай краіне і якія складаюць аснову нашай грамадзянскай супольнасці. Прыемна, што ў рады арганізацыі па закліку сэрца ўступае ўсё больш жанчын. Мы нікога не прымушаем. Нам не трэба, каб сюды прыходзілі людзі, каб папіярыцца. Нам трэба, каб прыйшлі людзі, якія памаленьку, нармальна, спакойна працавалі б у сябе ў рэгіёнах і падбіралі вакол сябе такіх жа аднадумцаў, якія будуць, можа, і не такія маштабныя задачы вырашаць, але вельмі патрэбныя для нашага народа і краіны. І гэта вельмі важна", - сказала Наталля Качанава.
У сустрэчы, якая праходзіць у Брэсцкім аблвыканкаме, удзельнічаюць 170 прадстаўніц абласной арганізацыі Беларускага саюза жанчын. Усяго ж у яе радах знаходзяцца амаль 23 тыс. чалавек - "самых прыгожых і актыўных жанчын рэгіёна", як сказала, прадстаўляючы аўдыторыю, старшыня БСЖ Вольга Шпілеўская.
Наталля Качанава звярнулася да прысутных з наказам, акрэсліўшы асноўныя пытанні і задачы, якія стаяць перад жаночай грамадскай арганізацыяй. Гэта перш за ўсё дэмаграфія, абарона традыцыйных сямейных каштоўнасцей, дапамога сем'ям, якія змагаюцца з такімі заганамі, як п'янства, наркаманія. "Калі мы з вамі пачнём працаваць з такімі людзьмі, колькі сем'яў выратуем! Нам трэба з вамі не адштурхваць, а пастарацца быць побач з імі. Мы павінны ўключыцца ў гэтыя тэмы, таму што гэта ўсё - жыццё нашых людзей, жыццё нашай краіны. Гэта тая незалежнасць, пра якую мы так часта гаворым", - падкрэсліла старшыня Савета Рэспублікі.
Яна адзначыла важнасць і патрэбнасць такіх сустрэч, запрасіўшы прысутных да шчырай размовы. Такая сустрэча ўжо адбылася ў Гродне. У Брэсце мерапрыемства прымеркавалі да старту міжнароднай акцыі Саюзнай дзяржавы "Поезд Памяці". У фармаце адкрытага дыялогу прадстаўніцы актыву БСЖ маглі задаць спікеру верхняй палаты парламента любыя пытанні.
"Мы ўвайшлі ў палітычна важны этап жыцця нашай краіны. Наперадзе ў нас выбарчая кампанія, калі мы будзем выбіраць не толькі дэпутатаў усіх узроўняў, але дэлегатаў на Усебеларускі народны сход, які будзе працаваць на працягу пяці гадоў. Гэта значыць чакаюцца важныя, і, па-мойму, цікавыя падзеі ў жыцці краіны. Наша будучыня залежыць ад кожнага з нас. Таму мы павінны быць адзіныя, як маналіт, і тады ніхто нам не страшны", - падкрэсліла Наталля Качанава.
