6 снежня, Брэст /Кар. БЕЛТА/. Мясцовым органам улады адводзіцца ключавая роля ў забеспячэнні экалагічнай бяспекі краіны. Аб гэтым заявіла ў Брэсце старшыня Савета Рэспублікі Наталля Качанава на выязным пасяджэнні Савета па ўзаемадзеянні органаў мясцовага самакіравання пры Савеце Рэспублікі па эфектыўным выкарыстанні і ахове прыродных рэсурсаў, перадае карэспандэнт БЕЛТА.
"З-за комплекснага міжведамаснага характару разглядаемых пытанняў намаганняў толькі профільных міністэрстваў відавочна недастаткова. Ключавую ролю неабходна адводзіць мясцовым органам улады, якія непасрэдна ўзаемадзейнічаюць з насельніцтвам і працуюць тут на зямлі, добра ведаюць спецыфіку свайго рэгіёна і рэалізацыю дзяржаўнай палітыкі на месцах", - сказала Наталля Качанава.
Яна звярнула ўвагу, што на парадак дня пасяджэнняў савета традыцыйна выносяцца найбольш актуальныя пытанні, якія маюць грамадскі рэзананс, здольны ўплываць на паступальнае развіццё краіны. "Важнасць разгляду розных аспектаў сумеснай дзейнасці прыродаахоўных арганізацый, органаў кіравання і самакіравання не выклікае сумненняў. Гэта адпавядае патрабаванням кіраўніка дзяржавы і рашэнням Усебеларускага народнага сходу. Без спрыяльнага навакольнага асяроддзя і экалагічнай бяспекі развіццё ў прынцыпе не ўяўляецца магчымым", - падкрэсліла спікер Савета Рэспублікі.
Пытанні аховы навакольнага асяроддзя і рацыянальнага выкарыстання прыродных рэсурсаў - адзін з прыярытэтных напрамкаў дзейнасці Савета Рэспублікі. Толькі з 2020 па 2023 год скарэкціраваны Кодэкс аб нетрах, Лясны кодэкс, законы аб ахове навакольнага асяроддзя, атмасфернага паветра, водных рэсурсаў, аб гідраметэаралагічнай дзейнасці, аб абыходжанні з адходамі і іншыя. Цяпер парламентарыі працуюць над змяненнямі ў законы "Аб абыходжанні з генетычнымі рэсурсамі", "Аб меліярацыі зямель", "Аб абыходжанні з адходамі".
"Ёсць пытанні, якія ўжо сёння ляжаць на паверхні і якія трэба ўрэгуляваць. Галоўнае, каб ад вас зыходзіла ініцыятыва. Каб мы не зацягвалі і не адкладалі іх вырашэнне, а разглядалі ўжо сёння. У тым ліку там, дзе трэба рэгуляваць гэта законам. Мы гатовы да гэтай работы і будзем рабіць аператыўна, калі гэта неабходна", - звярнулася да прысутных Наталля Качанава.
У пасяджэнні савета прымаюць удзел старшыня Брэсцкага аблвыканкама Юрый Шулейка, памочнік Прэзідэнта - інспектар па Брэсцкай вобласці Валерый Вакульчык, члены Савета Рэспублікі і дэпутаты Палаты прадстаўнікоў, кіраўнікі рэспубліканскіх органаў дзяржаўнага кіравання, старшыні абласных, Мінскага гарадскога, раённых і сельскіх саветаў дэпутатаў, члены Маладзёжнага савета пры Нацыянальным сходзе.-0-
