13 кастрычніка, Мінск /Кар. БЕЛТА/. Кантракты на больш як $56 млн падпісаны ў час рабочага візіту прэм'ер-міністра Беларусі Рамана Галоўчанкі ва Уфу і Чэлябінск, паведамляе карэспандэнт БЕЛТА.
Рабочы візіт урадавай дэлегацыі Беларусі на чале з прэм'ер-міністрам у расійскія рэгіёны прадоўжыўся тры дні. Гэтыя дні былі плённымі - праведзены шэраг перагавораў і сустрэч, дасягнуты новыя дамоўленасці, падпісаны кантракты.
Так, ва Уфе Раман Галоўчанка сустрэўся з кіраўніком Башкортастана Радыем Хабіравым. Таксама ў праграме было наведванне шэрага прадпрыемстваў, у тым ліку АТ "Уфімскі трамвайна-тралейбусны завод", ТАА "Сэрвіс-Майстар", АТ АПК "Аляксееўскі". Акрамя таго, кіраўнік беларускага ўрада прыняў удзел у цырымоніі ўрачыстага адкрыцця завода па вытворчасці зернесушыльных комплексаў ТАА "АМКАДОР-Агідэль". Таксама быў пакладзены пачатак будаўніцтву новага завода па вытворчасці спецыяльнай тэхнікі ТАА "АМКАДОР-Алга".
Таксама Беларусь перадала Башкортастану каля 70 адзінак тэхнікі вядучых машынабудаўнічых прадпрыемстваў. Урачыстая цырымонія перадачы адбылася ва Уфе 10 кастрычніка. Сярод перададзенай тэхнікі - пагрузчыкі "АМКАДОР", самазвалы МАЗ, трактары МТЗ, тралейбусы, вырабленыя з машынакамплектаў МАЗ.
У Чэлябінску Раман Галоўчанка сустрэўся з губернатарам Чэлябінскай вобласці Аляксеем Тэкслерам і наведаў аўтамабільны завод "Урал".
Да візіту быў прымеркаваны Беларуска-чэлябінскі бізнес-форум. Па яго выніках падпісаны шэраг дакументаў, у тым ліку пагадненне паміж Міністэрствам сельскай гаспадаркі Чэлябінскай вобласці і ААТ "МТЗ" на пастаўку трактароў, кантракт на пастаўку тэхнікі ААТ "АМКАДОР" паміж ТАА "АМКАДОР-Урал" і кампаніяй "Белмаш-Урал", кантракт на пастаўку ліфтаў вытворчасці ААТ "Магілёўліфтмаш" у адрас ТАА "Белур".-0-
