14 мая, Мінск /Кар. БЕЛТА/. У Беларусі важнейшыя рашэнні па развіцці дзяржавы грунтуюцца выключна на волі народа, заявіў карэспандэнту БЕЛТА старшыня ЦВК Ігар Карпенка.
"Рэалізацыя ініцыятывы Прэзідэнта аб правядзенні першага рэферэндуму 14 мая 1995 года сведчыць аб жаданні кіраўніка дзяржавы прымаць важнейшыя рашэнні па развіцці дзяржавы, выключна грунтуючыся на волі народа, - сказаў Ігар Карпенка. - Першы рэферэндум стаў зыходным пунктам рэалізацыі народнай палітыкі Аляксандра Лукашэнкі, заклаў новыя традыцыі народаўладдзя ўжо ў суверэннай Рэспубліцы Беларусь. А потым ужо былі праведзены Усебеларускія народныя сходы, з'явілася публічнае абмеркаванне праектаў нарматыўных прававых актаў, сістэмная работа са зваротамі грамадзян і юрыдычных асоб, дыялогавыя пляцоўкі і сустрэчы ў працоўных калектывах".
За ўсе гэтыя гады Беларусь умацавала сваю незалежнасць і пабудавала дзяржаву для народа, адзначыў кіраўнік ЦВК. "Праз пэўны час можна з упэўненасцю сказаць, што рашэнні першага і наступных рэферэндумаў былі стратэгічна правільнымі і кансалідавалі беларускае грамадства", - падкрэсліў Ігар Карпенка.
Першы рэферэндум у гісторыі Беларусі быў праведзены 14 мая 1995 года па ініцыятыве Прэзідэнта Аляксандра Лукашэнкі. На рэферэндум былі вынесены чатыры пытанні:
1) ці згодны вы з наданнем рускай мове роўнага статусу з беларускай?
2) ці падтрымліваеце вы прапанову аб устанаўленні новых Дзяржаўнага сцяга і Дзяржаўнага герба Рэспублікі Беларусь?
3) ці падтрымліваеце вы дзеянні Прэзідэнта Рэспублікі Беларусь, накіраваныя на эканамічную інтэграцыю з Расійскай Федэрацыяй?
4) ці згодны вы з неабходнасцю ўнясення змяненняў у дзеючую Канстытуцыю Рэспублікі Беларусь, якія прадугледжваюць магчымасць датэрміновага спынення паўнамоцтваў Вярхоўнага Савета Прэзідэнтам Рэспублікі Беларусь у выпадках сістэматычнага або грубага парушэння Канстытуцыі?
Першыя тры пытанні выносіліся на абавязковы рэферэндум, а адказ на чацвёрты павінен быў мець рэкамендацыйны характар.
У ходзе ўсенароднага галасавання ініцыятывы кіраўніка дзяржавы атрымалі шырокую падтрымку грамадства. Паводле даных Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў, па першым пытанні за выказаліся 4 017 273 чалавекі (83,3 працэнта), супраць - 613 516 чалавек (12,7 працэнта); за адабрэнне другога пытання прагаласавалі 3 622 851 чалавек (75,1 працэнта), супраць - 988 839 чалавек (20,5 працэнта); па трэцім пытанні за выказаліся 4 020 001 чалавек (83,3 працэнта), супраць - 602 144 чалавекі (12,5 працэнта); за адабрэнне чацвёртага пытання прагаласавалі 3 749 266 чалавек (77,7 працэнта), супраць - 857 485 чалавек (17,8 працэнта).
У спісы грамадзян, якія маюць права ўдзельнічаць у рэспубліканскім рэферэндуме, былі ўключаны 7 445 820 чалавек, у галасаванні на рэспубліканскім рэферэндуме прынялі ўдзел 4 823 482 чалавекі (64,8 працэнта).
7 чэрвеня 1995 года Прэзідэнт Беларусі выдаў указы нумар 213 "Аб зацвярджэнні эталона Дзяржаўнага герба Рэспублікі Беларусь і Палажэння аб Дзяржаўным гербе Рэспублікі Беларусь" і нумар 214 "Аб зацвярджэнні Палажэння аб Дзяржаўным сцягу Рэспублікі Беларусь", якія заканадаўча замацавалі змяненне дзяржаўнай сімволікі.
Пасля рэферэндуму руская мова ў Беларусі набыла статус дзяржаўнай, Прэзідэнт пашырыў свае паўнамоцтвы, а афіцыйнымі сімваламі краіны сталі сучасны сцяг і герб. У красавіку 1996 года, абапіраючыся на вынікі рэферэндуму, Мінскам і Масквой быў падпісаны Дагавор аб утварэнні супольніцтва Расіі і Беларусі, а ўжо ў снежні 1999 года была створана Саюзная дзяржава.-0-
