Выбары Прэзідэнта Беларусі арганізаваны на высокім узроўні, а таксама ў адпаведнасці з нацыянальным заканадаўствам Беларусі і агульнапрынятай практыкай. Аб гэтым на прэс-канферэнцыі ў Інфармацыйным цэнтры ЦВК заявіў кіраўнік групы наглядальнікаў ад Кітайскай Народнай Рэспублікі Се Сяаюн, перадае карэспандэнт БЕЛТА.
"Па запрашэнні Міністэрства замежных спраў Рэспублікі Беларусь місія наглядальнікаў ад Кітайскай Народнай Рэспублікі ажыццявіла назіранне за ходам датэрміновага галасавання і ў асноўны дзень выбараў Прэзідэнта Рэспублікі Беларусь. На працягу некалькіх дзён кітайская наглядальная місія наведала 11 выбарчых участкаў", - сказаў Се Сяаюн.
Кіраўнік групы наглядальнікаў ад КНР адзначыў, што наглядальнікі азнаёміліся з работай па падрыхтоўцы бюлетэняў, скрынь для галасавання і ідэнтыфікацыяй выбаршчыкаў, а таксама арганізацыяй галасавання. "У поўным аб'ёме і своечасова была апублікавана інфармацыя пра кандыдатаў. Выбарчы працэс прайшоў спакойна і паспяхова. Мы не заўважылі сур'ёзных выпадкаў парушэнняў. Выбары шырока і адкрыта асвятляліся беларускімі сродкамі масавай інфармацыі", - падкрэсліў ён.
Се Сяаюн канстатаваў: місія наглядальнікаў ад КНР лічыць, што выбары Прэзідэнта Беларусі арганізаваны на высокім узроўні, у адпаведнасці з нацыянальным заканадаўствам і агульнапрынятай практыкай. Выбары з'яўляюцца легітымнымі, дэмакратычнымі, празрыстымі і справядлівымі. "На заканчэнне кітайская місія выказвае ўдзячнасць ЦВК, Міністэрству замежных спраў, іншым органам і ведамствам Беларусі за аказаныя падтрымку і садзейнічанне ў нашай наглядальнай рабоце", - дадаў Се Сяаюн.-0-
