Намеснік начальніка галоўнага ўпраўлення агульнай сярэдняй і дашкольнай адукацыі - начальнік упраўлення агульнай сярэдняй адукацыі Міністэрства адукацыі Ірына Каржова расказала карэспандэнту БЕЛТА, колькі бацькам будзе каштаваць карыстанне камплектам школьных падручнікаў.
"Забеспячэнне вучняў устаноў агульнай сярэдняй адукацыі падручнікамі - адна з мер іх сацыяльнай абароны. Распрацоўка, выданне і ў далейшым перавыданне падручнікаў ажыццяўляецца за кошт бюджэтных сродкаў. Сродкі законных прадстаўнікоў школьнікаў на гэтыя мэты не прыцягваюцца", - падкрэсліла Ірына Каржова.
Яна адзначыла, што бацькі ўносяць плату за карыстанне падручнікамі, памер якой з'яўляецца фіксаваным і складае 0,5 базавай велічыні за камплект падручнікаў. "Такім чынам, кошт камплекта школьных падручнікаў, якія будуць выкарыстоўвацца з 1 верасня, складае Br21. Ніякіх змяненняў у парадак аплаты за карыстанне падручнікамі і разліку кошту не ўносілася", - праінфармавала прадстаўнік Мінадукацыі.-0-
