14 студзеня, Брэст /Кар. БЕЛТА/. Косаўскі палацава-паркавы комплекс у 2024 годзе наведалі амаль 120 тыс. турыстаў. Аб гэтым паведамілі карэспандэнту БЕЛТА ва ўстанове культуры.
Комплекс уключае дзве славутасці - мемарыяльны музей-сядзібу Тадэвуша Касцюшкі і палац Пуслоўскіх. У мінулым годзе там пабывалі звыш 117 тыс. чалавек. Для параўнання: у 2023 годзе было зарэгістравана 109 тыс. турыстаў. "Наш аб'ект адрозніваецца ад другіх. Косаўскі палац лічыцца жамчужынай Беларусі, прываблівае сваёй архітэктурай і месцам размяшчэння. Акрамя беларусаў, у нас шмат турыстаў з Расійскай Федэрацыі. Прыязджаюць госці з Польшчы, Германіі, Аўстрыі, Рэспублікі Карэя, Японіі, каб паглядзець нашу культурную спадчыну ва ўрочышчы Мерачоўшчына", - расказалі ў Косаўскім палацава-паркавым комплексе.
Наведвальнікі ў музеі Тадэвуша Касцюшкі могуць азнаёміцца з пастаяннай экспазіцыяй. У палацы Пуслоўскіх адкрыты восем залаў, дзе можна ўбачыць антыкварную мэблю, прадметы інтэр'ера і побыту. Экспанаты адлюстроўваюць эпоху ХІХ стагоддзя. У гістарычным будынку знаходзяцца таксама атэль і рэстаран.
Прычым развіццё інфраструктуры палацава-паркавага комплексу прадаўжаецца. Паступова закладваецца парк у англійскім стылі. У планах заняцца добраўпарадкаваннем возера, ачысціць яго акваторыю і прыбярэжную зону ад лішняй расліннасці і смецця. У перспектыве там хочуць зрабіць лакацыю для сямейнага адпачынку.
Разам з Брэсцкай крэпасцю, Белавежскай пушчай, паркам жывёл у Баранавічах у топ найбольш папулярных славутасцей Брэсцкай вобласці ўваходзіць Косаўскі палацава-паркавы комплекс. Шматгадовая рэканструкцыя палаца завяршылася ў канцы 2022 года. З таго часу ўсе залы гістарычнага будынка адкрыты для наведвання.-0-
