Кожнае дзіця павінна атрымаць падарунак да Новага года і Каляд, упэўнены намеснік прэм'ер-міністра Ігар Петрышэнка. Такое меркаванне ён выказаў журналістам перад пачаткам пасяджэння аргкамітэта па падрыхтоўцы акцый "Нашы дзеці" і "Ад усёй душы", перадае карэспандэнт БЕЛТА.
Традыцыйна напярэдадні навагодніх і калядных свят па ініцыятыве Прэзідэнта праводзіцца акцыя "Нашы дзеці". Таксама адносна нядаўна кіраўнік дзяржавы ініцыяваў акцыю "Ад усёй душы", якая таксама добра ўспрынята людзьмі, адзначыў Ігар Петрышэнка.
Акцыя "Нашы дзеці" стартуе 16 снежня 2024 года і прадоўжыцца па 15 студзеня 2025-га. У бягучым годзе ўрачыстае адкрыццё пройдзе ў Віцебску. "Ключавое мерапрыемства гэтай акцыі - традыцыйная ёлка ў Палацы Рэспублікі з удзелам кіраўніка дзяржавы, куды з усёй краіны прыедзе больш за 2 тыс. дзяцей, якія дабіліся поспехаў у грамадскім жыцці, спорце і маюць пэўныя льготы, маюць патрэбу ў дадатковай дзяржаўнай падтрымцы, абароне. Таксама ў рамках акцыі пройдзе традыцыйны баль для прадстаўнікоў маладзёжнага асяроддзя ў Палацы Незалежнасці, дзе будуць прадстаўлены лепшыя бальныя традыцыі, - расказаў віцэ-прэм'ер. - Акрамя таго, у маштабах усёй краіны, ва ўсіх рэгіёнах пройдуць адпаведныя мерапрыемствы з удзелам службовых асоб, грамадскіх структур".
Паводле яго слоў, у мінулым годзе акцыяй "Нашы дзеці" было ахоплена больш за мільён дзяцей, якія атрымалі падарункі і ўвагу. "Мэта гэтых акцый - звярнуць увагу на тых, хто мае патрэбу ў дапамозе і добрым слове", - адзначыў Ігар Петрышэнка.
У мінулым годзе было патрачана Br6,5 млн на падарункі, падтрымку сем'яў, пансіянатаў, дзе выхоўваюцца дзеці. "Мы таксама правялі дабрачынны марафон, дзе сабралі Br100 тыс., якія былі накіраваны ў Рэспубліканскі навукова-практычны цэнтр дзіцячай анкалогіі, гематалогіі і імуналогіі для дапамогі цяжкахворым дзецям. Такія акцыі яднаюць нашых грамадзян", - падкрэсліў ён.
У працяг з 26 снежня стартуе акцыя "Ад усёй душы". У мінулым годзе ёю было ахоплена больш за 330 тыс. пажылых грамадзян. "Нам важна захаваць сувязь паміж пакаленнямі - маладымі і пажылымі людзьмі, якія захавалі краіну і перадаюць яе ў надзейныя рукі нашай моладзі, нашай будучыні", - сказаў ён.
Віцэ-прэм'ер заклікаў далучыцца да акцый усіх неабыякавых людзей, каб накіраваць сабраныя грошы дзецям, маючым у гэтай дапамозе патрэбу. "Кожнае дзіця павінна атрымаць падарунак да Новага года і Каляд", - сказаў на заканчэнне Ігар Петрышэнка.
Удзельнікамі акцыі "Нашы дзеці" стануць навучэнцы кадэцкіх вучылішчаў і спецыялізаваных ліцэяў, пераможцы алімпіяд, творчых конкурсаў і спартыўных спаборніцтваў, навучэнцы з поспехамі ў грамадскай рабоце, дзеці-сіроты і дзеці, якія засталіся без апекі бацькоў, дзеці-інваліды, дзеці са шматдзетных і малазабяспечаных сем'яў, сем'яў бежанцаў і іншыя. Што датычыцца акцыі "Ад усёй душы", то яе ўдзельнікамі вызначаны ветэраны Вялікай Айчыннай вайны, ветэраны працы, доўгажыхары, адзінокія пажылыя людзі, пажылыя грамадзяне і інваліды, якія знаходзяцца ва ўстановах сацыяльнага абслугоўвання, бальніцах сястрынскага догляду, хоспісах.
Аргкамітэт па правядзенні гэтых мерапрыемстваў узначальвае намеснік прэм'ер-міністра Ігар Петрышэнка.-0-
