5 жніўня, Мінск /Кар. БЕЛТА/. У сектары малога і сярэдняга прадпрымальніцтва ў 2023 годзе быў заняты кожны трэці працаздольны беларус, паведамілі БЕЛТА ў Міністэрстве эканомікі.
Малое і сярэдняе прадпрымальніцтва ў Беларусі з'яўляецца перспектыўным сектарам эканомікі. У мінулым годзе ў рэспубліцы было зарэгістравана 368 037 суб'ектаў МСП, у тым ліку 27,9 працэнта мікраарганізацый (да 15 чалавек у штаце), 3,1 працэнта малых арганізацый (ад 16 да 100 чалавек), 0,6 працэнта сярэдніх арганізацый (ад 101 да 250 супрацоўнікаў) і 68,5 працэнта індывідуальных прадпрымальнікаў. Пры гэтым больш за ўсё суб'ектаў МСП маюць сталічную прапіску (31,7 працэнта), далей па колькасці зарэгістраваных прадстаўнікоў малога і сярэдняга бізнесу ідуць Мінская (18,1 працэнта) і Брэсцкая (12,2 працэнта) вобласці.
Паводле даных міністэрства, суб'ектамі МСП у 2023-м годзе сфарміравана звыш 25 працэнтаў ВУП, больш за трэць інвестыцый (39,1 працэнта) і падатковых паступленняў (35 працэнтаў), амаль палова экспарту тавараў (46,4 працэнта). Па выніках мінулага года суб'екты малога і сярэдняга прадпрымальніцтва экспартавалі тавараў на $18,6 млрд, аднак знешнегандлёвае сальда ўсё ж склалася адмоўным чынам, паколькі імпартавалі тавараў суб'екты МСП на $2,5 млрд больш.
Так, 74,6 працэнта арганізацый МСП занята ў сферы аказання паслуг, 25,4 працэнта - у сферы вытворчасці. Сярэдняя колькасць работнікаў сферы малога і сярэдняга прадпрымальніцтва ў агульнай сярэдняй колькасці работнікаў па краіне складае 34,6 працэнта. Сярэднямесячная зарплата ў сектары МСП роўная Br1970: Br1416 у сярэднім атрымліваюць работнікі мікраарганізацый, Br2230 - малых арганізацый і Br2212 - сярэдніх.
"Дзяржава прадоўжыць ствараць усе ўмовы для таго, каб уклад малога і сярэдняга бізнесу ў развіццё краіны пастаянна павялічваўся, а кожны ініцыятыўны беларус змог хутка адкрыць сваю справу і паспяхова яе маштабаваць", - заключылі ў прэс-службе эканамічнага ведамства.-0-
