9 верасня, Мінск /Кар. БЕЛТА/. Прэзідэнт Беларусі Аляксандр Лукашэнка арыентуе дэпутатаў на больш актыўную работу на міжнародным узроўні. Аб гэтым кіраўнік дзяржавы заявіў, прымаючы з дакладам Старшыню Палаты прадстаўнікоў Нацыянальнага сходу Ігара Сергяенку, перадае карэспандэнт БЕЛТА.
"Вельмі важна цяпер закруціць, раскруціць работу на міжнародным узроўні. Усё ж такі народная дыпламатыя, на чале якой павінны ісці дэпутаты, цяпер вельмі важна. І яна дае свой эфект. Вы бачыце гэта і па рабоце нашых сенатараў (членаў Савета Рэспублікі - верхняй палаты беларускага парламента. - Заўвага БЕЛТА). Іх, вядома, значна менш. Думаю, у гэтым напрамку трэба дзейнічаць і Палаце прадстаўнікоў. Тут як вы лічаце нам пабудаваць работу?" - абазначыў адну з тэм даклада кіраўнік дзяржавы.
Аляксандр Лукашэнка таксама пацікавіўся заканатворчай дзейнасцю дэпутатаў: "Як тут ідуць справы? Ці патрэбна якая-небудзь дапамога і падтрымка? Таму што вельмі шмат дэпутатаў першы раз выбраны. І, зразумела, вопыту работы парламенцкай няма. Ці ёсць тут якія-небудзь праблемы?"
Спытаў Прэзідэнт і пра работу Савета Палаты прадстаўнікоў, наколькі вырашаны розныя бытавыя пытанні народных выбраннікаў. "Як працуе структура, якая забяспечвае размяшчэнне, як жывуць дэпутаты? У нас жа дом пабудаваны, дзе дэпутаты ў час работы жывуць. Ці ўсім хапіла месца для пражывання? Можа, з гаспадарчага пункту гледжання нейкія ёсць праблемы?" - абазначыў пытанні беларускі лідар.
Ён таксама ў цэлым пацікавіўся, як Ігар Сергяенка свежым позіркам глядзіць на работу дэпутатаў у будучым як у цэнтры, так і на месцах.
У Ігара Сергяенкі асабіста Аляксандр Лукашэнка таксама спытаў, як яму працуецца на новай для яго пасадзе. Кіраўнік дзяржавы заўважыў, што за апошнія гады ў старшыні Палаты прадстаўнікоў адбываліся кардынальныя перамены ў кар'ерным плане. "З абсалютна закрытай, ціхай работы перайсці на работу самую цяжкую ў Адміністрацыю Прэзідэнта (раней Ігар Сергяенка працаваў у сістэме КДБ, пасля чаго некалькі гадоў да выбрання ў Палату прадстаўнікоў узначальваў Адміністрацыю Прэзідэнта. - Заўвага БЕЛТА), а потым яшчэ і Палата прадстаўнікоў. Гэта такія крутыя павароты ў жыцці, што любому чалавеку мала не падасца. Таму, як працуецца? Як працуе Палата прадстаўнікоў? Ці ўсе функцыянуюць органы і сістэмы нашай Палаты прадстаўнікоў?" - паставіў пытанні кіраўнік дзяржавы.
Як адзначыў Ігар Сергяенка, Палата прадстаўнікоў працуе ў абноўленым складзе ўжо фактычна пяць месяцаў. Паводле яго слоў, усе арганізацыйныя пытанні, якія ставіліся ў тым ліку і кіраўніком дзяржавы, вырашаны. Гэта датычыцца як забеспячэння работы кожнага дэпутата, арганізацыі, аснашчэння працоўных месцаў, так і пытанняў, звязаных з пражываннем. "Усе дэпутаты ў дастойных умовах сёння жывуць і працуюць", - сказаў старшыня Палаты прадстаўнікоў.
Характарызуючы цяперашні дэпутацкі корпус, Ігар Сергяенка праінфармаваў Прэзідэнта, што склад у значнай ступені быў абноўлены - з папярэдняга склікання ў цяперашні былі выбраны 20 дэпутатаў, 90 чалавек - фактычна новыя. "З розным вопытам работы, з розным узроўнем і юрыдычнай падрыхтоўкі, і ў цэлым з рознымі недзе падыходамі. Але ўсе яны патрыёты, працуюць на краіну", - падкрэсліў спікер ніжняй палаты парламента. Ён таксама паведаміў, што ў складзе дэпутацкага корпуса працуюць 73 мужчыны і 37 жанчын, 75 чалавек маюць вопыт кіруючай работы, у тым ліку кіраўніцтва працоўнымі калектывамі, 10 дэпутатаў маюць вучоныя ступені і званні, 70 дэпутатаў прадстаўляюць палітычныя партыі. Такі аналітычны зрэз, паводле слоў Ігара Сергяенкі, паказвае, што "выбраны аўтарытэтныя людзі", якія прадстаўляюць у парламенце інтарэсы рэгіёнаў, ад якіх яны выбіраліся.-0-
