13 лютага, Барысаўскі раён /Кар. БЕЛТА/. Прэзідэнт Беларусі Аляксандр Лукашэнка асабіста правярае боегатоўнасць Узброеных Сіл. Кіраўнік дзяржавы ў рамках раптоўнай праверкі прыбыў на 227-ы агульнавайсковы палігон у Барысаўскім раёне, перадае карэспандэнт БЕЛТА.
Кіраўнік дзяржавы пасля прыбыцця заслухаў даклад аб ходзе мерапрыемстваў праверкі. Падрабязнасці расказаў міністр абароны Віктар Хрэнін, якога толькі ў 7 раніцы папярэдзілі аб нечаканым прыездзе Прэзідэнта.
Аляксандр Лукашэнка пацікавіўся папярэднімі вынікамі праверкі. "Армія здольна ваяваць. Маршы ўсе зрабілі, на маршы нікога не страцілі", - далажыў дзяржаўны сакратар Савета бяспекі Аляксандр Вальфовіч.
Кіраўнік дзяржавы наведаў камандна-назіральны пункт батальёна ў раёне сканцэнтравання, дзе паразмаўляў з ваеннаслужачымі, азнаёміўся з выкананнем мерапрыемстваў праверкі. У тым ліку размова ішла аб тым, як арганізаваны побыт ваеннаслужачых.
Прэзідэнт падкрэсліў важнасць правядзення такіх праверак, каб падтрымліваць на высокім узроўні вывучку войскаў. "Праверку праходзяць усе. І нават міністр абароны і дзяржсакратар, - адзначыў Аляксандр Лукашэнка. - Цяпер зіма такая, што пад праверку падпадуць усе".
"Я не гавару, што гэта заўтра будзе. Але і не магу сказаць, што гэтага не будзе наогул", - заўважыў беларускі лідар, гаворачы пра неабходнасць быць гатовымі да любога развіцця падзей.
Пабываў кіраўнік дзяржавы і ў бліндажы, дзе размяшчаецца асабовы склад. Умовы хоць і па-ваеннаму паходныя, але ў выпадку ваеннага часу больш чым прымальныя. "У вас тут курорт", - заўважыў Аляксандр Лукашэнка, успомніўшы, як у гады яго службы даводзілася ваяваць і ў больш суровых умовах.
Прэзідэнт падкрэсліў, што салдаты павінны быць забяспечаны ўсім неабходным, каб выконваць свае задачы.
"Вучыцеся, вучыцеся. На ўсялякі выпадак вучыцеся. Будзеце ўмець усё рабіць - будзеце жыць", - даў наказ ваеннаслужачым кіраўнік дзяржавы.
Як паведамлялася БЕЛТА, маштабная праверка Узброеных Сіл па даручэнні Прэзідэнта Беларусі пачалася 16 студзеня. Першачарговая мэта - убачыць аб'ектыўную карціну, рэальны стан войскаў, ацаніць дзеянні ваеннаслужачых. Менавіта таму мерапрыемствы маюць раптоўны характар. Ключавой асаблівасцю праверкі з'яўляецца яе арганізацыя. Кіраўнік дзяржавы прыводзіць у баявую гатоўнасць воінскія часці, абмінаючы Міністэрства абароны і Генеральны штаб.
Прэзідэнт падпісвае распараджэнне пад грыфам "сакрэтна", у якім пазначана задума будучай праверкі. Дзяржсакратар Савета бяспекі Аляксандр Вальфовіч атрымлівае закрыты пакет з дакументам, пасля чаго выязджае ў вызначаную кіраўніком дзяржавы воінскую часць. Па даручэнні беларускага лідара да правядзення праверкі таксама быў прыцягнуты старшыня КДК Васіль Герасімаў.
Аляксандр Лукашэнка трымае ход праверкі на асабістым кантролі, рэгулярна заслухоўвае даклады дзяржаўнага сакратара Савета бяспекі.
Кіраўнік дзяржавы на нарадзе 3 лютага растлумачыў сістэму, па якой выбудавана праверка, наступным чынам: "Я ўсім давяраю. Але гэта - раптоўная праверка, якую праводзіць галоўнакамандуючы. І я хачу паглядзець, як у гэтай раптоўнай праверцы будуць дзейнічаць Генштаб і Мінабароны".
Першай была праверана воінская часць тэхнічнага забеспячэння - адна з буйнейшых воінскіх часцей Узброеных Сіл, дзе стаяць на захоўванні розныя ўзоры бранятанкавага ўзбраення і ваеннай тэхнікі. У ліку воінскіх часцей, якія былі правераны, - 19-я асобная гвардзейская механізаваная брыгада, 72-і гвардзейскі аб'яднаны вучэбны цэнтр, 38-я асобная гвардзейская дэсантна-штурмавая брыгада, 103-я Віцебская паветрана-дэсантная брыгада, 120-я асобная гвардзейская механізаваная брыгада, 11-я асобная гвардзейская механізаваная брыгада.
Пры правядзенні праверкі ўлічваецца вопыт вядзення баявых дзеянняў у сучасных ваенных канфліктах. Яе вынікі будуць пакладзены ў аснову ўдасканалення беларускай арміі.
Падрабязней
