11 кастрычніка, Шклоўскі раён /Кар. БЕЛТА/. Прэзідэнт Беларусі Аляксандр Лукашэнка ў час рабочай паездкі ў Шклоўскі раён даў старт рэспубліканскай акцыі "Дай лесу новае жыццё!", перадае карэспандэнт БЕЛТА.
З 12 кастрычніка па 12 лістапада Міністэрства лясной гаспадаркі праводзіць рэспубліканскую добраахвотную акцыю "Дай лесу новае жыццё!". Яе мэта - аднаўленне бураломных участкаў лесу. Прыняць удзел у акцыі можа кожны жадаючы, запісацца ў рады добраахвотнікаў можна ў лясгасах. Асаблівая ўвага будзе ўдзелена аднаўленню лесу ў Гомельскай і Магілёўскай абласцях: менавіта яны найбольш пацярпелі ад разгулу стыхіі.
Аляксандр Лукашэнка яшчэ ў жніўні ў час паездкі ў Мазырскі раён паставіў задачу правільна арганізаваць дапамогу насельніцтву ў пацярпелых рэгіёнах, перапрацаваць пашкоджаны і павалены лес, а следам аператыўна заняцца лесааднаўленнем. Прэзідэнт тады падкрэсліў, што да гэтай работы неабходна прыцягнуць у тым ліку і насельніцтва, працоўныя калектывы, студэнтаў. "Мы павінны за будучы год усё гэта аднавіць. За зіму трэба спланаваць. Шулейка (віцэ-прэм'ер. - Заўвага БЕЛТА) мне ўчора дакладваў, што саджанцамі мы забяспечаны. Трэба парадак навесці. Толькі так мы можам выратаваць гэтыя пустуючыя кавалкі", - сказаў кіраўнік дзяржавы.
Па традыцыі прывіць суграмадзянам любоў да роднай зямлі Прэзідэнт вырашыў асабістым прыкладам. З яго ўдзелам у Шклоўскім раёне, на малой радзіме Аляксандра Лукашэнкі, створаны лясныя культуры дуба і елкі. Усяго на плошчы 0,6 га было высаджана 2 тыс. дрэў.
Як паведамлялася, па распараджэнні кіраўніка дзяржавы на тэрыторыі ляснога фонду краіны ўстараняюцца наступствы ліпеньскага ўрагану. Паводле папярэдніх даных, моцнымі вятрамі была пашкоджана драўніна на плошчы 25 тыс. га з запасам драўніны 2,4 млн куб.м, пры гэтым суцэльным санітарным высечкам падлягала 2 млн куб.м.
У выніку вятроў і дэталёвага абследавання аб'ём распрацоўкі толькі па суцэльных санітарных высечках вырас практычна ў тры разы і склаў 5,7 млн куб.м. Паводле стану на 11 кастрычніка высечкі лесу праведзены на плошчы 19,8 тыс. га, нарыхтавана больш за 3,2 млн куб.м драўніны, у тым ліку суцэльныя высечкі - на тэрыторыі 10,7 тыс. га з аб'ёмам нарыхтоўкі 3,1 млн куб.м.
Драўніна будзе выкарыстана на дрэваапрацоўчых вытворчасцях рэспублікі. Да канца бягучага года закантрактавана больш як 3,7 млн куб.м драўніны для патрэб унутранага рынку.-0-
