Прэзідэнт Беларусі Аляксандр Лукашэнка на адкрыцці міжнароднага фестывалю мастацтваў "Славянскі базар у Віцебску" ўручыў прэміі Саюзнай дзяржавы ў галіне літаратуры і мастацтва за 2023-2024 гады людзям, якія ўнеслі значны ўклад ва ўмацаванне дружбы паміж народамі Беларусі і Расіі, перадае карэспандэнт БЕЛТА.
Прэміі Саюзнай дзяржавы ў галіне літаратуры і мастацтва за 2023-2024 гады былі прысуджаны ў студзені бягучага года на пасяджэнні Вышэйшага дзяржаўнага савета Саюзнай дзяржавы.
Прэмія прысуджана аўтарскаму калектыву ў складзе галоўнага архітэктара "Белдзяржпраекта" Віктара Скробата, мастака-манументаліста, члена Беларускага саюза мастакоў Андрэя Пяткевіча, дырэктара Нацыянальнага гістарычнага музея Рэспублікі Беларусь Аляксандра Храмога - за стварэнне музея ў дзяржаўным мемарыяльным комплексе "Хатынь".
Лаўрэатам прэміі стаў таксама пазаштатны аўтар Выдавецкага дома "Звязда" Уладзімір Ліхадзедаў за стварэнне і рэалізацыю гісторыка-асветнага праекта "Бацькаўшчына", выданне аўтарскіх кніг-альбомаў.
Прэмія прысуджана гендырэктару навукова-творчай установы культуры Краснадарскага края "Кубанскі казацкі хор" Віктару Захарчанку за стварэнне цыкла песень "Беларусь", "Русь", "Цераз рэчаньку".
Прэміі Саюзнай дзяржавы ў галіне літаратуры і мастацтва прысуджаюцца адзін раз у два гады Вышэйшым дзяржсаветам за творы літаратуры і мастацтва, якія ўносяць вялікі ўклад ва ўмацаванне адносін братэрства, дружбы і ўсебаковага супрацоўніцтва паміж Беларуссю і Расіяй.-0-
