14 сакавіка, Масква /Кар. БЕЛТА/. Прэзідэнт Беларусі Аляксандр Лукашэнка прадаўжае афіцыйны візіт у Расійскую Федэрацыю, які з'яўляецца першым замежным візітам беларускага лідара пасля перавыбрання ў студзені бягучага года, паведамляе БЕЛТА.
Плануецца, што сёння, у другі дзень візіту, кіраўнік беларускай дзяржавы наведае Савет Федэрацыі, верхнюю палату расійскага парламента, дзе чакаецца яго выступленне на пленарным пасяджэнні і сустрэча са старшынёй Савета Федэрацыі Валянцінай Мацвіенка.
Аляксандр Лукашэнка прыбыў у Маскву 13 сакавіка, і ў гэты ж дзень у Крамлі адбыліся афіцыйныя перагаворы з Прэзідэнтам Расіі Уладзімірам Пуціным. Тэт-а-тэт кіраўнікі дзяржаў размаўлялі крыху больш за гадзіну. Потым пытанні парадку дня абмеркавалі ў пашыраным складзе з удзелам членаў дэлегацый. Гэты сегмент перагавораў прайшоў у фармаце абеду.
Не выключана, што кіраўнікі дзяржаў яшчэ могуць прадоўжыць размову, аб чым напярэдадні заявіў Прэзідэнт Беларусі: "Мы правялі толькі трэць нашых перагавораў. Мы прадоўжым заўтра, калі трэба, і паслязаўтра нашы перагаворы, каб падумаць аб перспектывах. Іх трэба вызначаць. Час ідзе хутка і ставіць перад намі нямала пытанняў".
На перагаворах з расійскім лідарам Аляксандр Лукашэнка заявіў аб народнай падтрымцы ў Беларусі курсу на супрацоўніцтва з Расіяй, што ў тым ліку прадэманстравалі і вынікі праведзеных прэзідэнцкіх выбараў. "А гэта ж было галасаванне: "Мы з Расіяй, усходні наш вектар, тут наша калыска або недзе там?" Ну вось адказ. Народ даў адказ. І ў нас гэта пытанне, як галоўнае пытанне, ціха, непублічна, яно заўсёды стаяла. Гэта асаблівасць нашых выбараў усіх", - сказаў ён.
Прэзідэнт заявіў аб гатоўнасці Беларусі падключыцца да амбіцыйных нацыянальных праектаў у Расіі. "Разам з Прэзідэнтам Расіі думаем ужо не толькі аб аднаўленчым росце і імпартазамяшчэнні, але і аб апераджальным развіцці. Нешта пачалі рабіць па асобных напрамках. Беларусі і Расіі патрэбны тэхналагічны прарыў у імя будучыні нашых краін і народаў. Усё неабходнае для гэтага ў нас ёсць. Нават больш, чым трэба", - упэўнены беларускі лідар.
Аляксандр Лукашэнка таксама пацвердзіў сваю плануемую прысутнасць на Парадзе Перамогі ў Маскве 9 мая, калі будзе адзначацца 80-годдзе Перамогі ў Вялікай Айчыннай вайне. "Вам, расіянам, дзякуй за тое, што вы ідзяце ў авангардзе гэтага працэсу. Без вас цяжка было б адстаяць тую Вялікую Перамогу, якой мы сёння ганарымся. Для нас, беларусаў, вялікі гонар прыняць удзел у юбілейным Парадзе Перамогі на Краснай плошчы ў Маскве 9 мая 2025 года", - падкрэсліў кіраўнік дзяржавы.
Кіраўнікі дзяржаў адказалі на розныя пытанні ад прадстаўнікоў СМІ, якія ў тым ліку датычыліся перспектыў перамір'я і далейшага мірнага ўрэгулявання ва Украіне, рэалізацыі саюзных планаў у эканоміцы, магчымасці аднаўлення супрацоўніцтва з заходнімі партнёрамі, якія пакінулі рынак, і ўмоў, на якіх гэта будзе магчыма.
Уладзімір Пуцін падкрэсліў, што інтарэсы Беларусі пры выбудоўванні ўзаемаадносін Расіі з кім бы там ні было ўлічваюцца заўсёды. Гэта звязана з вельмі цесным супрацоўніцтвам краін у самых розных сферах. "Улічваць інтарэсы Беларусі - поўнасцю адпавядае нацыянальным інтарэсам Расіі, - падкрэсліў расійскі лідар. - Не ўлічваць інтарэсы Беларусі для нас шкодна самім".
Па выніках перагавораў прэзідэнты падпісалі сумесную заяву. У дакуменце адзначаецца, што перагаворы прайшлі ў атмасферы дружбы, узаемаразумення і даверу. Лідары краін пацвердзілі саюзніцкі характар адносін паміж Беларуссю і Расіяй і нязменнасць курсу на пашырэнне стратэгічнага партнёрства ва ўсіх сферах. У сумеснай заяве таксама выказана пазіцыя бакоў па шэрагу ключавых пытанняў ва ўзаемадзеянні на міжнароднай арэне.
Адбыўся абмен граматамі аб ратыфікацыі Дагавора аб гарантыях бяспекі ў рамках Саюзнай дзяржавы, які пасля гэтага ўступіў у сілу.
Прэзідэнты падпісалі Пагадненне аб мерах па ўзаемнай абароне грамадзян ад неабгрунтаванага праследавання замежнымі дзяржавамі і міжнароднымі органамі юстыцыі.
Кіраўнікі дзяржаў таксама падпісалі пратакол аб унясенні змяненняў у двухбаковы дагавор аб роўных правах грамадзян ад 25 снежня 1998 года. Дакументам замацоўваецца магчымасць на ўзаемнай аснове беларускім і расійскім грамадзянам, якія пастаянна пражываюць на тэрыторыі іншай дзяржавы, удзельнічаць у мясцовых выбарах - выбіраць і быць выбраным у органы мясцовага самакіравання. Пастаянна пражываючыя ў Беларусі грамадзяне Расіі і да гэтага мелі такую магчымасць, а цяпер аналагічныя правы ў Расіі атрымалі і грамадзяне Беларусі.
У рамках візіту таксама падпісаны шэраг дакументаў на ўзроўні ўрадаў і ведамстваў дзвюх краін.-0-
