3 чэрвеня, Улан-Батар /Кар. БЕЛТА/. Прэзідэнт Беларусі Аляксандр Лукашэнка прапануе Манголіі вызначыць тры-чатыры асноўныя праекты ў развіцці супрацоўніцтва на першым этапе. Аб гэтым ён заявіў на перагаворах у пашыраным складзе з Прэзідэнтам Манголіі Ухнаагійн Хурэлсухам, перадае карэспандэнт БЕЛТА.
"Мы не пакутуем ад гігантаманіі. Мы добра разумеем нашы адносіны і сваё месца ў адносінах Манголіі з іншымі краінамі. Мы хацелі б з нечага добрага, вялікага пачаць з вамі. 3-4 праекты, каб мы маглі пераканаць і ваш народ, і кіраўніцтва краіны, і журналістаў, і вашу апазіцыю, што мы нешта можам. Давайце гэтыя 3-4 праекты вызначым, і мы вам пакажам, што можам з вамі супрацоўнічаць не горш, чым вы супрацоўнічаеце з гэтымі вялікімі імперыямі (буйнымі і ўплывовымі ў свеце краінамі. - Заўвага БЕЛТА). У пытаннях супрацоўніцтва з вамі мы абсалютна адкрыты. Я прашу вас прыслаць да нас сваіх спецыялістаў, дэлегацыю, каб яны ўбачылі, як развіваецца Беларусь, і выбралі для сябе тое, што спратрэбіцца для Манголіі", - сказаў кіраўнік дзяржавы.
"Мы гатовы для вас вырашыць любыя праблемы, якія здольны (вырашыць. - Заўвага БЕЛТА). І па якіх вы ўбачыце ў нас у Беларусі, як яны вырашаюцца", - запэўніў беларускі лідар.
Аляксандр Лукашэнка запрасіў Прэзідэнта Манголіі і яго калег зрабіць візіт у Беларусь, каб асабіста паглядзець, як жыве і развіваецца краіна.
Кіраўнік дзяржавы ўпэўнены, што перагаворы ў Манголіі паслужаць новым пачынанням ва ўзаемаадносінах дзвюх краін. Ён успомніў свой першы візіт у Манголію ў 1992-м у якасці дэпутата. "Надзвычайныя змяненні ў вашым развіцці. Нават няма з чым параўноўваць, - падкрэсліў Аляксандр Лукашэнка, гаворачы аб поспехах Манголіі. - Сёння, гледзячы на Улан-Батар, я наогул уражаны. Новыя будынкі, збудаванні. Прагрэс бачны на кожным кроку, пачынаючы з аэрапорта. Я вас віншую з гэтым велізарным прагрэсам".
Прэзідэнт таксама заявіў аб падтрымцы знешняй палітыкі Манголіі: "Гэта адзіна правільны шлях. Заціснутыя паміж дзвюма імперыямі, вялізнымі дзяржавамі, вы вельмі тонка, акуратна праводзіце знешнюю палітыку, балансуючы паміж гэтымі сіламі. Ведаю, як няпроста вам утрымацца на плаву і павышаць дабрабыт вашага народа".
Цяперашні перыяд для Манголіі ён ахарактарызаваў як вельмі складаны, важны і пераломны момант. Размова аб маючых адбыцца парламенцкіх выбарах. “Вы валодаеце каласальнымі рэсурсамі, вялізнымі багаццямі. Гэта ваша вялікае дабро. Але гэта дабро трэба зберагчы, абараніць. Таму што свет сёння ашалеў. Паважаюць толькі сілу. І каб існаваць у гэтым шалёным свеце, трэба быць моцным. Я ад усёй душы жадаю вам быць моцнымі, каб выжыць у гэтым свеце і зрабіць мангольскі народ заслужана багатым і вялікім, - сказаў Прэзідэнт. - Вялікі Чынгісхан, перад якім вы схіляецеся, і заслужана, таму што ў вас вялікая гісторыя, заўсёды вучыў: каб нечага дасягнуць, кожнаму трэба на сваім месцы рабіць сваю справу. А ўлада павінна быць жорсткай, цвёрдай, як кулак. Растапыранымі пальцамі ўладу ніхто не трымае".-0-
